Ayiti-Foutbòl : Fifa sispann pou yon ti tan prezidan Federasyon ayisyèn foutbòl la, Yves Jean-Bart, ki gen akizasyon kadejak sou timoun sou do l

Pòtoprens, 25 me 2020 [AlterPresse] --- Chanm envestigasyon komisyon etik Federasyon entènasyonal asosyasyon foutbòl yo (Fifa) sispann, pou yon ti tan, Yves Jean-Bart, prezidan Federasyon ayisyèn foutbòl la, nan sa ki gen pou wè ak tout aktivite ki konsène foutbòl nan nivo nasyonal ak entènasyonal, pou 90 jou.

Fifa pran sanksyon sa a sou baz atik 84, 85 kòd etik òganizasyon mondyal la.

Sanksyon sa a antre nan kad ankèt y ap mennen sou Jean-Bart, ki gen akizasyon vyòl sou timoun ki poko gen 18 lane, apre yon atik jounal anglè "The Guardian " te soti nan dat 30 avril 2020.

Dapre chanm envestigasyon komisyon etik endepandan Fifa, Jean -Bart resevwa enfòmasyon sou desizyon sa lendi 25 me 2020 an.

Sanksyon an koumanse aplike imedyatman, toujou dapre komisyon Fifa an. [mff apr 25/05/2020 18:00]