Haiti
Atik

Ayiti-Kovid-19 : Otorite lasante yo anonse dispozisyon pou kontwole fwontyè ak Repiblik Dominiken yo, nan Plato santral


Ekri jou mèkredi 13 me 2020

Pòtoprens, 13 me 2020 [AlterPresse] --- Direktè sante nan depatman Plato santral lan, Joseph Denis Jean-Baptiste, di gen dispozisyon, ki pran sitou nan Beladè, nan antre ofisyèl fwontyè ak Repiblikk Dominiken yo, yon fason pou kontwole tout moun k ap antre nan peyi a, dapre enf òmasyon ajans sou entènèt AltèPrès ranmase.

Alatèt sante nan depatman Plato santral lan fè deklarasyon sa yo, nan kad yon kozman ak laprès, li t ap bay an dirèk, nan lopital inivèsitè Mibalè a.

Ministè lasante a pa pran dispozisyon nan bay swen ak fè prevansyon. Men tou, li travay nan siveyans epidemi Kovid-19 lan, nan tout komin depatman Plato santral lan, dapre Joseph Denis Jean-Baptiste.

Yon lòt bò, direktè lasante nan depatman Plato santral lan swete popilasyon an montre bon konprann ni, nan kite otorite yo mete sant espesyal, nan komin yo, pou kontinye resevwa malad Kovid-19 yo.

« Fòk nou panse pou aprè Kovid-19 lan », se sa doktè Ralph Ternier, kowòdonatè yon gwoup travay sou Kovid-19 lan, nan Zanmi Lasante, deklare.

Kowonaviris la montre tout feblès, ki genyen nan sistèm sante nan peyi a.

Konsa, sitiyasyon sa a se yon bon moman, pou tèt ansanm pou poze pwoblèm sistèm sante an nan peyi d Ayiti.

Materyèl, otorite lasante yo ap kòmande, nan moman sa a, pa dwe sèvi pou Kovid-19 lan sèlman. Yo dwe la tou pou lopital yo, sizoka ta gen yon lòt maladi, aprè Kovid-19 lan, dapre doktè Ralph Ternier. [rf emb rc apr 13/05/2020 15:45]