Ayiti-Jistis : Rezo nasyonal k ap defann dwa moun yo kritike fason, direktè Inite lit kont koripsyon mande administratris li a pou al reponn kesyon l

Pòtoprens, 7 me 2020 [AlterPresse] --- Rezo nasyonal k ap defann dwa moun yo leve vwa l byen wo, kont fason direktè Inite lit kont koripsyon, Rockfeller Vincent, ap mennen dosye sibvansyon Biwo monetizasyon pwogram èd pou devlòpman (Bmpad) an te bay Rezo an, nan lane 2016, dapre sa ki vin jwenn ajans enfòmasyon sou entènèt AltèPrès.

Dosye sa a te lakòz anpil bouch louvri nan Rezo nasyonal k ap defann dwa moun yo, lè youn nan reskonsab li yo (Marie Yolène Gilles) ta pral remèt demisyon l nan enstitisyon sa a.

Direktè Inite lit kont koripsyon an, yon òganis Leta, pa gen ankenn pouvwa, pou l mande moun vini reponn kesyon l.

Se sa ki eksplike konsène a, Marie Gesly Damas Jean-Pierre, ki se administratris rezo nasyonal k ap defann dwa moun yo, boude konvokasyon Inite lit kont koripsyon an, dapre sa Mèt Fanfan Guerin, ki se avoka Rezo nasyonal k ap defann dwa moun yo, esplike AltèPrès.

Inite lit kont koripsyon mete yon avi rechèch, dèyè Marie Gesly Damas Jean-Pierre, aprè l derefize, pandan 2 fwa, reponn konvokasyon Rockfeller Vincent sou dosye sa a.

Avoka a di yo gen tan fè yon aksyon, nan nivo lajistis, pou mande mete atè direktè Inite lit kont koripsyon an, Rockfeller Vincent, sou baz atik 85 kòd penal la epi atik 27 Konstitisyon an.

Malgre sa, Mèt Fanfan Guerin di Rezo nasyonal k ap defann dwa moun yo pare pou l remèt kèk dokiman bay Inite lit kont koripsyon an, sizoka enstitisyon sa a ta bezwen enfòmasyon anplis, pou l kontinye ankèt li an. [rf emb rc apr 07/05/2020 16:10]