Pòtoprens, 5 me 2020 [AlterPresse] --- Brigad sendikal anti koripsyon menase pase nan yon lòt etap, sizoka chèf gouvènman an, Joseph Jouthe, pa pran desizyon desann pri gaz la nan 72 èd tan, nan yon nòt ki rive jwenn ajans enfòmasyon sou entènèt AltèPrès.
Brigad sendikal anti koripsyon mande premye minis ayisyen an pran tout dispozisyon pou desann, prese prese, pri gaz lan (pri galon dyezèl lan, pri galon gazolin ak pri gaz blan an) sou mache nasyonal la.
Desann pri gaz lan ap pèmèt popilasyon an rale yon souf, nan yon moman, kote ka Kovid-19 yo kontinye ap ogmante nan peyi a, daprè kowòdonatè gwoupman sa a, Sonson Dumé.
Brigad sendikal anti koripsyon di maladi kowonaviris lan ba l gwo kè kase, lè li konnen Leta pa janm mete kanpe yon bon jan sistèm sanitè, ki pou ta fè fas kare ak kèlkilanswa fòm maladi ki ta atake popilasyon an.
Barik petwòl la ap vann anviwon 24 dola ameriken sou mache entènasyonal la, nan mwa me 2020 an. [rf emb rc apr 05/05/2020 14:00]
Consulter +
