Pòtoprens, 4 me 2020 [AlterPresse] --- Senatè Patrice Dumont mande fanmi ti jèn foutbolèz yo, ki ta viktim kadejak nan sant teknik Federasyon ayisyen foutbòl lan, pote plent kont prezidan federasyon ayisyèn foutbòl la, Yves Jean-Bart.
Menm si poko gen ankenn limyè ki fèt sou dosye a, pou moman an, prezidan Federasyon ayisyen foutbòl lan, Yves Jean-Bart, ta dwe retire kò l, nan tèt federasyon an, pou yon ti tan, dapre sa senatè a di, nan yon nòt pou laprès, ki rive jwenn ajans enfòmasyon sou entènèt AltèPrès.
Nan lide pou asire sekirite fizik ak sikolojik jèn foutbolèz yo, Ministè jenès ak espò ta dwe antre an kontak, prese prese, ak Federasyon an, pou l mete yon chèf sekirite nan sant lan, yon sipèvizèz aktivite foutbolèz yo ak yon sikològ, ki ta dwe yon fanm, daprè Patrice Dumont.
Gen akizasyon ki fèt kont prezidan Federasyon ayisyèn foutbòl la, Yves Jean-Bart, kòm moun ki ta fè kadejak ak tizonnay sou jèn foutbolèz seleksyon ayisyèn yo, daprè yon atik jounal peyi Angletè, ki rele « The Guardian ».
Yves Jean-Bart voye jete, byen lwen, akizasyon sa yo.
Li fè konnen li te mande Rezo nasyonal k ap defann dwa moun yo al mennen ankèt sou dosye sa a.
Plizyè òganizasyon feminis, tankou Solidarite fanm ayisyèn (Sofa), Kay Fanm ak Kri fanm Ayiti (Krifa) mande Yves Jean Bart kite tèt federasyon an, epi mande otorite nan ministè jistis ak sekirite piblik yo louvri yon ankèt, prese prese, sou dosye sa a. [rf emb rc apr 04/05/2020 15:25]
Consulter +
