Pòtoprens, 01 me 2020 [AlterPresse] --- Nan okasyon jounen entènasyonal travay, vandredi premye me 2020 an, Sendika ouvriyèz ak ouvriye yo kontinye ekzije bon jan travay, pou otorite nan Leta yo mete nan peyi a, dapre sa ajans enfòmasyon sou entènèt AlterPresse ranmase.
Sekretè jeneral Santral nasyonal ouvriyèz ak ouvriye ayisyen yo, Dominique Saint-Eloi, di l regrèt premye me 2020 an rive nan yon kontèks kriz sanitè.
Sitiyasyon sa a kapab anpeche mobilizasyon fèt nan kat kwen peyi a, pou fè tande divès revandikasyon ouvriyèz ak ouvriye yo rive nan zorèy otorite yo, tankou ogmantasyon salè minimòm travayèz ak travayè yo, epi bon jan akonpayman pou ouvriyèz ak ouvriye yo.
Otorite konsènen yo ta dwe itilize lajan, y ap resevwa nan peryòd kovid-19 lan, pou relanse pwodiksyon nasyonal la.
Sa a, se youn pami divès rekòmandasyon Santral nasyonal ouvriyèz ak ouvriye ayisyen yo.
Sendika ouvriyèz ak ouvriye sa a ankouraje otorite nan Leta yo fè sa li rele yon "dyalòg sosyal", yon zouti, dapre limenm, ki ka pèmèt yo jwenn solisyon divès pwoblèm sosyal, peyi d Ayiti ap konnen depi plizyè lane.
Yon lòt bò, kowòdonatè Inyon nasyonal nòmalyen ak edikatè ayisyen yo, Georges Wilbert Franck, lonje dwèt sou konpòtman politisyen ayisyen yo, ki kontante yo satisfè enterè pèsonèl yo, san kreye bon jan travay pou popilasyon an, nan peyi a.
Inyon nasyonal nòmalyen ak edikatè ayisyen yo denonse move kondisyon travay ouvriyèz ak ouvriye yo, nan peyi a.
Ouvriyèz ak ouvriye yo pa janm jwenn ankenn akonpayman, ni bò kote Leta, ni bò kote sektè ekonomik lan.
Jwen travay kòmsadwa, se yon dwa fondamantal tout moun genyen.
Tout moun ta fèt pou leve kanpe, jouk otorite konsènen yo garanti dwa yo genyen pou yo travay, dapre Inyon nasyonal nòmalyen ak edikatè ayisyen yo. [rf emb rc apr 01/05/2020 07:40]
Consulter +
