Pòtoprens, 27 avril 2020 [AlterPresse] --- Prezidan Jovnèl Moyiz anonse gouvènman Joseph Jouthe lan pral koumanse fè transfè lajan, nan yon ti bout tan, bay plis pase yon milyon senk san mil moun nan peyi d Ayiti, nan yon deklarasyon, lendi 27 avril 2020 an, ajans enfòmasyon sou entènèt AltèPrès te suiv.
Yon lòt fwa ankò, Jovnèl Moyiz rekonèt li te fè pwomès, li pa rive respekte. Jovnèl Moyiz di li rekonèt gen reta, nan pwomès transfè lajan li te fè yo.
Li fè konnen transfè lajan yo ta sipoze koumanse nan 4 depatman. Chak moun ta sipoze resevwa 3 mil goud.
Pou ouvriyèz ak ouvriye yo, Leta te bay plis pase 200 milyon goud li te pwomèt yo. Sa ki fè, pou koulye a, gen plis pase 54 mil ouvriyèz ak ouvriye, ki ta jwenn lajan salè pou plis pase 15 jou, dapre Jovnèl Moyiz.
Fon asistansw ekonomik ak sosyal pral fè, koul konnen, pou fè sa yo rele pwogram Kore Pèp la rive jwenn lòt moun, ki plis nan bezwen yo, ki rete nan lòt zòn nan peyi a, tankou sou zile Lagonav.
Jovnèl Moyiz di, gouvènman Jout lan blije kontinye kenbe tout dispozisyon pwoteksyon yo, nan lide pou kwape maladi Kovid-19 lan.
Li di li swete minis finans lan, nan tèt kole ak minis edikasyon nasyonal lan, jwenn yon antant, nan objektif pou bay pwofesè lekòl yo ak Inivèsite yo yon èd lajan, jan li te pwomèt yo sa.
Jovnèl Moyiz fè konnen tou, ekipman ak materyèl gouvènman an te komande yo koute plis pase 2 milya goud, san konte frè transpò ekipman sa yo, ki vo plizyè milyon goud nan avyon, olye bato ki t ap pran plis tan pou rive nan peyi d Ayiti.
Plizyè sektè mande gouvènman an bay laverite, pa kache popilasyon an anyen, sou jan l ap fè depans yo, sou jan l ap sèvi ak tout èd li resevwa, nan kad batay kont Kovid-19 la, yon fason pou evite koripsyon. [rf emb rc apr 27/04/2020 19:40]
Consulter +
