Pòtoprens, 22 avril 2020 [AlterPresse] --- Yo pa fè okenn tès, sou 129 Ayisyen, gouvènman peyi Etazini vle voye tounen sou teritwa peyi d Ayiti an, nan dat jedi 23 avril 2020 an, pou gade si yo ta gen mikwòb Kovid-19 lan.
Se sa Nicole Philips, youn nan moun ki siyen pou plis pase 160 òganizasyon dwa moun, ki leve vwa yo kont desizyon gouvènman Etazini, deklare bay AltèRadyo.
Jedi 22 avril 2020 an, 129 Ayisyen ta dwe rive nan peyi d Ayiti. Pami yo, 49 timoun k ap ansanm ak paran yo.
Nouvo depòtasyon sa a ap fèt, 2 semèn apre gouvènman ameriken an te depòte 68 ayisyen nan peyi a.
« Gen anpil moun ki espoze, pou trape mikwòb Kowonaviris lan nan prizon Ozetazini. Yo vle depòte 129 Ayisyen sa yo, pou gouvènman peyi d Ayiti kenbe yo epi trete yo. Yo pa fè tès Kovid-19 lan sou okenn nan moun y ap voye Ayiti yo », dapre sa Nicole Philips fè konnen.
Otorite ameriken yo vle se gouvènman ayisyen an, ki pou fè tès sou 129 moun y ap voye Ayiti yo.
Òganizasyon dwa moun, ki leve lavwa kont desizyon gouvènman ameriken an, pou voye 129 Ayisyen isit, nan moman kriz kowonaviris lan, poze kesyon sou kapasite gouvènman ayisyen an, pou ta fè tès sou 129 moun yo.
Depi dat jedi 19 as 2020 an, se sèlman 500 - 600 tès Ministè sante piblik ak popilasyon fè nan peyi a, pou gade ki moun ki gen mikwòb Kowonaviris lan.
« Pami moun, ki te rive madi 7 avril 2020 an, se apre 10 - 11 jou otorite lasante ayisyen yo te fè tès sou yo ».
Nicole Philips di li gen gwo kè sote, sou sitiyasyon lasante 129 Ayisyen, gouvènman ameriken an ap voye nan peyi d Ayiti yo.
« Se yon enjistis. Moun, y ap voye vin Ayiti yo, kapab pote mikwòb Kowonaviris lan bay moun nan peyi d Ayiti yo ».
« Se politik gouvènman Etazini an, ki fòse gouvènman ayisyen an aksepte desizyon depòtasyon an. Se menm tandans lan avèk Misyon nasyonzini, yo di ki te la pou estabilize peyi d Ayiti an (Minista), avèk Òganizasyon nasyon zini, avèk anbasad ameriken ».
Gen yon pakèt ayisyen, ki bloke nan peyi Etazini, ki vle retounen nan peyi a.
Alòske li aksepte gouvènman ameriken an depòte yon seri Ayisyen, gouvènman ayisyen an fè yon seri ekzijans, bay sila ki bloke nan epyi Etazini yo. Yon seri ekzijans, ki depaman ak lalwa, ki pa rekonèt dwa yo kòm Ayisyen, ki gen dwa tounen nan peyi yo lè yo vle.
Gouvènman Joseph Jouthe lan ekzije pou Ayisyen, ki bloke Etazini yo, vini ak rezilta tès, ki di yo pa gen mikwòb Kowonaviris lan. Epitou, pou yo ta al pase 14 jou nan 2 otèl prive, sou frè pa yo. [mj emb rc apr 22/04/2020 13:00]
Consulter +
