Atik

Lasante : Ouvriyèz ak ouvriye nan faktori Kodevi Wanament gen anpil kè kase, pou travayè dominiken pa transmèt yo mikwòb Kovid-19 lan


mardi 21 avril 2020

Wanament, 21 avril 2020 [AlterPresse] --- Travayèz ak travayè Ayisyen nan konpayi devlopman endistriyèl (Kodevi), nan Wanament (Nòdès peyi d Ayiti), di yo gen gwo kè sote, pou travayè dominiken yo pa vin kontamine yo avèk mikwòb Kovid-19 lan, akòz jan maladi sa a ap fè ravaj lakay vwazen peyi d Ayiti.

Izin yo louvri pòt yo lendi 20 avril 2020 an, espesyalman nan Kodevi, jan sa te anonse, daprè sa kowòdonatè sendika ouvriye nan Wanament, Frantzy Tid, fè konnen sou AlterRadio (106.1 Fm).

Se Repiblik dominikèn k ap dirije travay anndan izin sa yo, alòske maladi a ap fè ravaj lakay yo. Dominiken sa yo fè ale vini, chak jou, soti nan peyi yo pou vini Ayiti, dapre eksplikasyon Frantzy Tid.

« Depi yo wè dominiken yo, travayèz ak travayè Ayisyen yo gen pwoblèm. Moun yo al travay chak jou, kont yo menm. Y ap plenyen. Si yo te gen Leta, se pa yo ki ta pral travay ak dominiken, ki gen maladi Kovid19 lan k ap gaye lakay yo. Gen danje pou tout travayèz ak travayè Ayisyen yo ta trape mikwòb Kovid-19 lan, si ta gen yon dominiken ki gen maladi an ».

Men, andedan ak deyò izin Kodevi yo, pou lendi 20 avril 2020 an, yo respekte kèk mezi pwoteksyon, responsab yo te anonse yo, tankou mete dlo ak savon pou lave men, pran tanperati chak ouvriyèz ak ouvriye, distans 1 mèt edmi pou machin k ap koud yo.

Poko gen sansibilizasyon bò kote ouvriyèz ak ouvriye yo, pou evite yon moun trape maladi kowonaviris la.

Anplis, anpil nan ouvriyèz ak ouvriye sa yo pa kwè nan mesaj, otorite yo ap fè pase sou Kovid-19 lan.

Aprè anviwon yon mwa moun yo fè, youn pa wè lòt, se ak akolad, bobo, ouvriyèz ak ouvriye yo t ap akeyi youn lòt, jou lendi 20 avril 2020 an nan Kodevi Wanament.

Yo pa t gen mas pwoteksyon nan figi yo.

Menm polisye nasyonal, ki te la, pa t rive kontwole sitiyasyon sa a.

Gouvènman Joseph Jouthe lan te anonse, mèkredi 15 avril 2020 an, desizyon gouvènman li an pran pou relouvri izin yo, nan dat lendi 20 avril 2020 an, pou kapab sove anviwon 58 mil travay nan faktori yo.

Jouthe te pwomèt enspeksyon, reprezantan ministè sante piblik ak afè sosyal, pou al founi je gade si yo respekte dispozisyon pwoteksyon yo, andeda faktori yo. [mj emb rc apr 21/04/2020 17:50]