Español English French Kwéyol

Ayiti-Ensekirite : Ansyen senatè Jean-Charles Moïse leve lavwa kont atak ak zam, ki lakòz yon bòfrè l mouri nan Okap ayisyen

Pòtoprens, 15 avril 2020 [AlterPresse] --- Alatèt pati politik Pitit Desalin nan, ansyen senatè Jean-Charles Moïse, leve lavwa kont yon atak, moun ak zam, li pa rive idantifye, fè kay fanmi madanm ni, nan vil Okap ayisyen, lannuit lendi 13 rive madi 14 avril 2020 an, nan yon kozman pou laprès, nan Pòtoprens, ajans enfòmasyon sou entènèt AltèPrès te suiv.

Ansyen senatè a konfime lanmò bòfrè li, Analigène Cherenfant, pandan atak nèg ak zam sa yo. Viktim nan te resevwa plizyè katouch.

Kidonk, nan atak sa a, gen yon moun ki mouri anba bal. Gen yon lòt moun, ki blese grav, k ap pran swen lopital, epi yon moun yo pa wè ki kote l pase jiska prezan, dapre sa ansyen senatè a rapòte.

Gen youn nan moun, ki t ap viv nan kay la, ki disparèt nan moman atak ak zam, lendi 13 pou louvri madi 14 avril 2020 an. [jep emb rc apr 15/04/2020 09:50]