Español English French Kwéyol

Ayiti-Ensekirite : Pou piti 3 moun mouri, plizyè lòt blese anba bal, dimanch maten 12 avril 2020 an, nan zòn Pòtay Leyogan Pòtoprens

Pòtoprens, 13 avril 2020 [AlterPresse] --- Pou piti 3 moun mouri, plizyè lòt blese anba bal bandi ak zam, dimanch maten 12 avril 2020 an, nan zòn Pòtay Leyogan, dapre sa ajans enfòmasyon sou entènèt AltèPrès aprann.

Mehu Changeux, kowòdonatè jeneral Asosiyasyon pwopriyetè ak chofè ayisyen yo, ki t ap pale ak AltèPrès, leve lavwa kont zak sa a, ki lakòz plizyè chofè transpò piblik ak moun ki konn chaje machin viktim.

Genyen 5 moun, ki konn chaje machin, ki pran katouch. Pami yo, genyen 3 ki mouri sou kabann lopital, daprè sa sendikalis la fè konnen.

Genyen 7 chofè, ki fè trajè Pòtay Leyogan-Klèsin, ki pran katouch, san konte pasaje ak lòt moun, ki t ap pase nan zòn nan, nan moman kout zam bandi sa yo.

Changeux Mehu denonse otorite Leta yo, ki, dapre li, pa janm fè anyen, ni pran bon jan dispozisyon, pou mete yon fren nan lese frape ant gwoup ak zam yo nan sant vil Pòtoprens lan, sitou nan blòk pou travèse Matisan, lè yon moun soti oubyen prale nan Sid peyi d Ayiti.

Nan fen lane 2019 la, yon enspektè polis te tonbe anba bal, moun yo pa t rive idantifye, nan Pòtay Leyogan. [rf emb rc apr 13/04/2020 15:15]