Milo (Ayiti), 13 avril 2020 [AlterPresse] --- Yon gwo dife boule, byen bonè maten lendi 13 avril 2020 an, chapèl legliz katolik women Imakile Konsepsyon an, yon patrimwan ki trouve l nan Milo, nan Nò peyi Dayiti, depi epòk lane 1800 yo.
Malgre tout tantativ, ni bò kote popilasyon an, ni bò kote ponpye, yo pa t rive etenn dife sa a, ki boule lokal legliz la, daprè sa majistra komin Milo a, Bernadin Jacques, fè ajans enfòmasyon sou entènèt AltèPrès konnen.
Otorite yo poko konnen ki jan dife a fè pran nan chapèl la, ki trouve l tou pre Palè Sansousi.
Majistra komin nan fè konnen otorite yo koumanse mennen ankèt. Men, jis koulya a, yo poko konnen ki sa k lakoz dife a rive pran, nan chapèl la.
Chapèl Milo a te konstrui ant lane 1810 pou rive 1813, sou reny wa Henry Christophe. Legliz sa a te sibi gwo domaj nan moman tranbleman tè lane 1842 an. Yo te refè l nan lane 1930-1933.
Nan lane 1995, Enstiti pou kenbe patrimwan nasyonal peyi d Ayiti an(Ispan) te antre Legliz sa a nan lis patrimwan nasyonal yo. [rf emb rc apr 13/04/2020 10:20]
Consulter +
