Latibonit (Ayiti), 02 avril 2020 [AlterPresse] --- Yon timoun 14 lane mouri, nan komin Machan Desalin (depatman Latibonit), nan dat jedi 26 mas 2020, aprè li te prezante kèk siy, ki ta sanble avèk pa Kovid-19 lan, dapre sa ajans sou entènèt AltèPrès aprann.
Timoun 14 lane sa a mouri, kèk jou aprè li te soti Sendomeng, Repiblik Dominikèn.
Mete sou sa, moun, ki te an kontak ak li yo, prezante menm siy yo, daprè delege awondisman Desalin nan, Wadner Joseph.
Tousuit aprè nouvèl sa a, Direksyon depatman, miinistè sante piblik nan Latibonit, te fè prelèvman sou moun sa yo, pou gade si yo ta gen mikwòv Kovid-19 lan.
yo ta sipoze bay rezilta tès sa yo vandredi 3 avril 2020 an.
Bò kote pa l, Direktè depatman sante Latibonit lan, Marcel Chatelier, ki te konfime enfòmasyon sa a, fè konnen, pou kounye a, tout moun sa yo sou siveyans (sa yo rele sitiyasyon karantèn nan, an atandan rezilta tès yo, pou yo ka fè suivi nesesè yo.
Marcel Chatelier anonse gen rezilta 4 lòt tès, y ap tann tou, nan dat vandredi 3 avril 2020 an, toujou pou depatman Latibonit la.
Depi dat 31 mas 2020 an, se 16 moun, otorite lasante yo konte, ki trape maladi kowonaviris la nan peyi d Ayiti. [rf emb rc apr 02/04/2020 16:25]
Consulter +