Pòtoprens, 16 jiyè 2019 [AlterPresse] --- Jij enstriksyon Ramoncite Accimé voye envitasyon bay ansyen premye minis Jean Max Bellerive, sou prezidan René Préval, ak ansyen premye minis Laurent Salvador Lamothe, sou prezidan Michel Joseph Martelly, dapre enfòmasyon ajans sou entènèt AlterPresse jwenn.
Jean Max Bellerive, ki te premye minis peyi d Ayiti soti 11 novanm 2009 rive 18 oktòb 2011, dwe parèt, devan jij enstriksyon an, vandredi 19 jiyè 2019, k ap vini la a, alòske jij la ap tann Laurent Lamothe nan dat jedi 25 jiyè 2019.
Bellerive te minis planifikasyon ak kowoperasyon, soti 9 jen 2006 pou rive 19 oktòb 2011. Lamothe, ki te premye minis peyi d Ayiti soti 16 me 2012 rive 14 desanm 2014, te jwe wòl minis planifikasyon ak kowoperasyon soti 6 dawou 2012 rive 14 desanm 2014.
Sou bò pa l, ansyen minis planifikasyon ak kowoperasyon, Yves Germain Joseph, dwe prezante l devan jij la na dat mèkredi 31 jiyè 2019.
Lendi 5 dawout 2019, se dat jij la kenbe pou tande ansyen minis Stephanie Balmir Villedrouin, ki te anchaje ministè touris soti 20 oktòb 2011 rive 23 mas 2016.
Mèkredi 7 dawout 2019, se pral tou pa Jacques Rousseau, ki te minis travo piblik ak kominikasyon an, yon premye fwa soti 16 me 1994 rive 8 novanm 1994, epi yon dezyèm fwa soti 18 oktòb 2011 rive 23 mas 2016, pou parèt nan kabinè enstrisksyon Pòtoprens.
Gen anviwon yon semèn, depi avoka moun, ki te pote plent nan dosye PetwoKaribe an, te mande jij enstriksyon Ramoncite Accimé retire tèt li nan dosye PetwoKaribe an, akoz li pa t ko poze okenn aksyon, ki montre volonte l ak kouraj li pou mennen dosye a jis nan bout. [db gp apr 16/07/2019 00:30]
Consulter +
