Pὸtoprens, 29 avril 2019 [AlterPresse]--- Obsèvatwa ayisyen dwa moun di li leve lavwa, pou jan l wè otorite politik ak polisye yo on ti jan manfouben epi parèt konplis, nan pakèt zak bandi k ap simen laterè toupatou sou teritwa peyi d Ayiti an.
Otorite sa yo pa fè anyen pou kwape bandi, k ap simen latwoublay nan mitan popilasyon an depi plizyè semenn.
Bandi sa yo sanble jwenn sipò kèk palmantè, gwo tèt nan Lapolis nasyonal lan ak manm gouvènman an, daprè sa Obsèvatwa ayisyen dwa moun di nan yon nòt li fè ajans AlterPresse jwenn.
Obsèvatwa ayisyen dwa moun voye solidarite l bay plizyè moun, ki viktim zak bandi nan Lasalin, Tokyo, Delma 6, Kafou fèy (Pòtoprens) ak Ti Rivyè Latibonit (depatman Latibonit).
Nan lannuit mèkredi 24 avril 2019 la, 8 moun, pami yo yon fanm ansent, mouri anba bal gwoup gang ki gen alatèt li, Sony Jean, yo plis konnen sou non Ti je. Nan atak bandi ak zam sa yo, gen yon douzèn moun ki te blese anba bal tou.
Obsèvatwa ayisyen dwa moun egzije yon ankèt entènasyonal sou divès krim, band sa yo ap fè nan peyi a. Yon seri bandi, ki sanble ta ap dodomeya sou sipὸ yo jwenn nan sistèm politik, k ap toufounen sosyete ayisyèn nan. [emb rc apr 29/04/2019 12:15]
Consulter +
