Pὸtoprens, 08 avril 2019 [AlterPresse]--- Toujou gen ratman gaz nan peyi d Ayiti, sitou nan zὸn metropolitèn Pὸtoprens lan, malgre divès pwomès Biwo monetizasyon pwogram èd pou devlὸpman (Bmpad) fè bay popilasyon an, daprè konsta AlterPresse fè.
Bmpad, ki anchaje fè kὸmann gaz pou Ayiti, te anonse, depi madi 2 avril 2019 lan, gaz lan ap disponib.
Poutan, depi plizyè jou, gen anpil moun, tankou chofè moto, chofè kamyonèt ak lὸt machin, k ap tann gaz, pandan plizyè èd tan, nan divès ponp nan zὸn metropolitèn kapital lan.
Jou dimanch 7 avril 2019 la, gen yon bato-sitèn, ak yon chajman 255 mil barik pwodwi petwolye, ki debake nan tèminal Tò, nan komin Kafou, daprè sa direktè Bmpad lan fè konnen.
Se depi alapapὸt 2019, peyi d Ayiti ap fè fas kare ak ratman gazolin ak dyezèl, aloske otorite yo ap tante fè popilasyon an kwè sitiyasyon an sou kontwὸl.
Yon eksplikasyon, ki pa koresponn ak reyalite an.
Menm Lakomin pὸtoprens te deside, nan dat mèkredi 3 avril 2019, sispann ranmase fratra, paske li poko ka jwenn gaz pou mete nan kamyon li yo.
Depi kèk tan, fatra blayi pil sou pil, toupatou nan zὸn metropolitèn Pὸtoprens lan. [jep emb rc apr 08/04/2019 10:00]
Consulter +