Haiti
Atik

Ayiti-Ensekirite : Moun ki te sou wout Matisan pase yon move moman, madi swa 27 novanm 2018, anba men bandi ak zam


Ekri jou mèkredi 28 novanm 2018

Potὸprens, 28 novanm 2018 [AlterPresse]--- Moun ki abite avni Bòlòs, katye Matisan (nan sid Pòtoprens) ak sila ki t ap pase nan zòn nan pase yon move moman, anba men gwoup moun ak zam, nan lannwit madi 27 novanm 2018, daprè enfòmasyon AlterRadio rasanble bò kote plizyè viktim.

Nèg ak zam sa yo, ki te sòti Gran ravin, yon katye nan Matisan, anvayi wout katriyèm ak senkyèm avni Bòlòs, tanmen fouye machin, piblik kou prive, epi volè tout bagay, sitwayèn ak sitwayen ki t ap rantre lakay yo te pote.

Atoufè yo pa t gen okenn respè ni pou granmoun, ni pou fanm ak timoun, ki te sou wout la, dapre sa plizyè tewmen rapòte.

Plizyè viktim fanm eksplike kòman bandi gran chimen sa yo te menm peze tete yo ak lòt pati entim nan kò yo.

Sitwayèn ak sitwayen sa yo, ki viktim aba men atoufè ak zam sa yo, di yo bouke ak maswife y ap monte anba men zagoloray yo, depi kèk tan, san lapolis nasyonal pa janm fè anyen, pou mete yon bout nan degenn bandi sa yo.

Sitiyasyon sa a te lakoz yon gwo blokis, ki dire plis pase katrèdtan sou wout nasyonal nimewo 2 a.

Nan batay enstitisyon lapolis la ap mennen, pou jwenn kontwol zòn sa yo, plizyè inite espesyalize te debake nan Vilajdedye, pou te mete men nan kòlèt chèf gang yo rele Arnel Joseph.

Operasyon lapolis lan, nan Vilajdedye, pa bay bon jan rezilta. Arnel Joseph te gen tan chape pou l li.

Pandan tan sa a, bandi ak zam kontinye ap touye moun, san gade dèyè, nan sid Pòtoprens la.

Ant mwa janvye pou rive septanm 2018, komisyon legliz katolik women Jistis ak lapè (Jilap) te konte 415 ka moun, ki mouri anba bal nan Pòtoprens ak alantou li.

60 pousan viktim zak sa yo, kidonk 249 moun, te pèdi lavi yo nan sid Pòtoprens, dapre rapò Jilap lan. [wdb emb rc apr 28/11/2018 13:35]