Pòtoprens, 23 out 2018 [AlterPresse] --- Inite espesyalize Lapolis kominotè nan Polis nasyonal Ayiti a, nan tèt kole ak Misyon nasyonzini pou apiye lajistis Ayiti (Minijis) epi òganizasyon Viva rio lanse, mèkredi 22 dawout la, pwogram Matisan san vyolans.
Pwogram sa gen pou objektif kontrekare ensekirite ki gen nan twazyèm sikonskripsyon an.
Chèf kabinè depatmantal lwès polis nasyonal la, Jean Ismagne Auguste, salye inisyativ lan pandan li di lapolis pral konbat ensekirite ak vyolans nan twazyèm sikonskripsyon Pòtoprens lan atravè yon apwòch altenatif.
Reprezantan Minijis la, Mama Diallo, nan diskou sikonstans li, di Nasyonzini ap ankouraje peyi a konbat vyolans nan katye popilè yo atravè yon apwoch kominotè. Apwoch sila vize transfòme moun kap viv nan katye sa yo vin yon ajan pou lapè.
Reprezantan òganizasyon entènasyonal Viva Rio ki pral reyalize pwogram sa, Pedro Bram eksplike metòd yo a chita sou òganize aktivite espotif, kiltirèl, anviwonman ak fè fòmasyon pou jèn yo.
Depi yon bon bout tan, vyolans layite nan zòn Matisan, kote plizyè gwoup gang monte tant yo. Plizyè moun mouri, blese, kay boule nan Matisan akòz aksyon gang yo. Fanmi yo ap viv ak kè sote. [apr 23/08/2018 15 :00]
Consulter +
