Pòtoprens, 6 jiyè 2018 [AlterPresse] --- Gwo tansyon blayi, apremidi vandredi 6 jiyè 2018 lan, nan plizyè katye nan Pòtoprens, apre enfòmasyon ki sikile sou ogmantasyon pri gaz la apati samdi 7 jiyè 2018 lan, a minui.
Barikad wòch ak kawoutchou k ap boule anvayi lari yo, espesyalman nan Dèlma, Bonrepo, Pòtay Leyogàn. Gen panik, pandan anpil moun ap chache mete yo alabri.
Moun ki te nan travay blije rete kote yo ye yo, pou pa riske vi yo. Sa k te deja pran lari, kouri antre kay zanmi, paske fanmi yo rele yo, di yo pa pran lari.
Sikilasyon paralize nan anpil katye epi komès fèmen.
Dapre yon nòt ofisyèl, ki sikile sou rezo sosyal yo, gouvènman an mete 85 goud sou pri gazolin nan, ki pase nan nivo 309 Goud, 85 Goud sou pri dizel la, ki pase nan nivo 264 goud, 89 goud sou pri kewozen nan, moun plis konnen sou non gaz blan an, ki pase nan nivo 262 goud.
Minis kominikasyon an, Guyler Delva, di AlterRadio ak AlterPresse se yon ajisteman gouvènman fè. Li di tou, si gouvènman an pa monte pri gaz la, "sitiyasyon an ap vin pi mal".
Enfòmasyon sou nouvo pri gaz la lage tèt chaje, vin jwenn espwa Ayisyen ki fanatik Brezil bwè lwil, avèk ekip Brezil la ki pèdi devan Bèljik, ki bat li 2 a 1 nan koupdimonn Risi a.
Depi plizyè semèn, plizyè òganizasyon te anonse mobilizasyon kont ogmantasyon pri gaz la.
Toujou gen tansyon tou nan Peleren, kote Leta koumanse degèpi abitan ki rete tou pre kay prezidan Jovenel Moise la.
Minis Guyler Delva mande pou viktim yo ta pase nan Kontribisyon (Dgi), men depite Kenskof la, Alfredo Antoine, di desizyon gouvènman an pou kraze kay abitan yo ilegal. [apr 06/07/2018 17:00]
Consulter +
