Miyami : Konsekans kriz la sou Nwèl Ayisyen yo nan dyapora a

Miyami, 27 des. 04 [AlterPresse] --- Kriz ki ap ravaje peyi Dayiti depi kèk tan gen gwo konsekans sou Nwèl Ayisyen yo ki ap viv nan Floride. Anpil moun te espere pou nwèl ane sa sitiyasyon an te ka miyò parapòta lane pase. Anpil Ayisyen ki ape viv deyò te swete pase fèt fen lane sa nan peyi a ansanm avèk fanmi yo. Yo te menm swete klotire selebrasyon 200 zan lendepandans peyi a. Men sitiyasyon an pa pèmèt yo fè sa. Ensekirite a moute tèlman wo, pifò moun ranvwaye pwojè vwayaj yo te konte fè an Ayiti, dapre sa AlterPresse konstate nan Miyami.

Se chak segond Ayisyen ki deyò peyi a ap resevwa move nouvèl sou sa ki ap pase sou tè lakay yo. Nan tout estasyon radyo ak televizyon ki nan divès vil nan Eta Floride tout moun ap plenyen pou fason sitiyasyon an vin pi mal an Ayiti. Dènye sòti chimè lavalas yo fè madi 21 desanm nan nan zòn avni Poupla, riyèl Karavèl ak ri Bren Riko pote kominote ayisyèn nan mal anpil.

Sèten pati nan kòmantè yo lage tout chay la sou do patizan ansyen prezidan Jean-Bertrand aristide yo ki lakòz prèske 200 moun mouri depi yo lanse sa yo rele « operasyon Bagdad » la nan mwa septanm nan. Dòt kritike anpil anpil premye minis enterimè a Gérard Latortue. Chèf gouvènman pwovizwa a, ki se moun Miyami, pèdi on bon pati nan popilarite li. Nan Miyami, yo pale de premye minis Gérard Latortue kòm yon dirijan ki awogan e ki pa gen kontwòl okenn dosye serye nan peyi a, sitou pa dosye ensekirite a. E gen moun tou ki pa ezite lage chay Ayiti a sou do peyi etranje yo.

Nan medya ak nan lari ou santi jan kominote ayisyèn nan nan Florid ap mal viv sa ki ap pase lakay yo. Chak fwa ou kwaze yon Ayisyen se lokazyon pou plenyen sou sa ki ap pase lakay. Sezon an pi sèch ankò pou mizisyen Ayisyen yo. Anpil ap viv ozetazini sitou nan Eta Florid. E yo te pwograme pou antre an Ayiti vin fè moun danse. Sa pa posib.

Ayisyen yo blije vire gade lòt peyi nan Karayib la, osnon lòt Eta nan peyi Meriken pou pase vakans nwèl la. Alòske se sèlman 105 minit ki separe Pòtoprens ak Miyami. [Weibert Arthus - Miyami - apr 27/12/04 12 :00]