Nòt pwotestasyon ak denonsiyasyon yon kolektif sitwayen ak òganizasyon altènativ pwogresis
Dokiman sa a vin jwenn AlterPresse mèkredi 23 jen 2016
Nou menm ansanm sitwayen ak òganizasyon ki siyen nòt sa, n ap denonse ak tout fòs nou atitid ‘‘senatè’’ mal eli PHTK yo afiche nan Palman an nan dat madi 21 jen 2016 la kote Youri Latortue, Edo Zenny, Carl Murat Cantave, Jacques Sauveur Jean elt... debake ak gwo zam fann fwa nan espas la ak objektif klè pou teworize moun ki pa sou menm pozisyon avèk yo. Se rèl kay makorèl e sitiyasyon sa merite non sèlman denonse men konbat tou sou tout fòm.
Tout moun te kapab wè ak je yo, imaj yo fè tou mond lan atravè rezo sosyal yo, kòman mesye sa yo soti zam alamen pou vin fè fas kare ak kèk moun nan Popilasyon an de bra balan ki t ap mobilize devan Palman an. Swadizan pou yo pwoteje tèt yo. Pwoteje tèt yo kont kisa ? Kont kilès ? Kont Pèp la ? Men te kwè se nan eleksyon demokratik epi popilè yo di yo soti, yo di se Lepèp kite vote yo.
San n pa ta imajine pratik sa yo sanble tankou de gout dlo ak lè Lame Dayiti te konn ap teworize, vyole epi reprime yon Popilasyon fanm, gason, jèn ki te lage 2 men de pye yo pou enpoze dikta yo. Nou te konnen deja se konsa lame Dayiti te konn aji ak malere malerèz. Se nan menm matris panse sa mesye bandi legal sa yo soti, yo pa ta kapab yon lòt jan.
Carl Murat Cantave ale menm jouk nan menase pou l touye 3 senatè. Mezanmi, lasosyete, eske moun debyen kapab tolere yon bagay konsa ? Ni nou pa kapab banalize l tou. N ap pale de konstwi yon peyi, yon nasyon, yon sosyete ak yon Leta. Pou tout moun ki te gen dout sou sa, atitid sa montre yon lòt fwa ankò moun sa yo se dasomann yo ye, yo pa gen ankenn karaktè reskonsab konsekan Leta tout bon. Nou konprann pi byen ki sa k fè ekip bandi legal la mete ak entènasyonal la (Kò Gwoup, Etazini, Kanada, Lafrans) te batay pou se moun sa yo ki la jounen jodi a. Mesye sa yo montre tou yo pa nan wotè konjonkti politik difisil peyi a ap viv nan moman an. Aksyon vakandondaj mesye sa yo sonnen tankou yon apèl pou lagè sivil nan peyi a. Akilès yo pral fè lagè sivil sa a ? Ak yon popilasyon ki de bra balanse, 2 men l de pye l. Mezanmi !
Nou pa gen dout sou sa, mesye sa yo se tòsyonè ak bandi granm lajounen yo ye. Pèsonn pa kapab bliye kijan Senatè Carl Murat Cantave, poutan ki di se doktè li ye, t ap banalize vyòl nan yon deklarasyon li te fè nan mwa avril 2016 pou l te atake demach Prezidan Privert pou mete kanpe yon komisyon evalyasyon ak verifikasyon tout sektè òganize nan popilasyon an (anwetan bandi legal Tèt kale yo) t ap mande. Senatè doktè a pa t gen krentif di ak anpil awogans epi enpètinans : ‘‘l ap vyole prezidan an’’ si prezidan an vyole ‘‘akò’’ fevriye 2016. Pawòl yon Senatè larepiblik, menmsi l malatchong menmsi l konteste. Mezanmi nan kisa nou pran la ? Ki kote nou tonbe la ? Kote prestij fonksyon an, kote rezèv nan langaj la, kote sans reskonsablite a ? Eske yon reskonsab nan Leta gen dwa ap fè elòj yon krim tankou vyòl ? Alevwa kounye a pou l ap mache ak zam nan men l !
Nan sans sa, n ap envite tout Senatè ‘‘serye’’ ki nan Palman an, politisyen ki gen konviksyon toujou, ki kwè nan defann enterè peyi a olye enterè klan ak enterè blan pou desolidarize yo de gwoup malveyan sa. Malgre nou pa dakò ak prensip sa ki di : se sèl Palman an ki gen dwa sanksyone moun ki deja anndan l (poutèt Palman an se pa yon kò apa nan sosyete a) men kòm yo toujou kenbe l, n ap mande Palmantè kòrèk yo pou pran tout dispozisyon prese prese pou mete mesye dasoman bandi legal sa yo deyò nan enstitisyon an. Mesaj la dwe klè peyi Jan Jak Desalin, Anryèt Sen Mak, Moyiz Louvèti ak Katrin Flon an pap tounen savann pou bandi legal galonnen.
Anatandan sansksyon sa, n ap envite Palmantè tout bon yo, anpatikilye Senatè ki pa malonèt, ki pa bandi epi ki pa vin itilize lejitimite popilè a kòm drapo pou fè lajan, manipilasyon ak zak vagabondaj, pou yo refize chita menm kote ak eleman bandi sa yo.
Sitwayen ak asosiyasyon ki siyen pwotestasyon sa :
BELFLEUR, Jean Willy.
BOUMBA, Nixon.
CENADIN, Léonès.
CLERVEAU, Michelet.
DARBOUZE, James.
ETIENNE, Jean Odile.
EXENTUS, Renel.
JOSEPH, Jean Reynold.
JOSEPH, Patrick.
JOSEPH, Renardo.
LINDOR, Panel,
LOUIS, Raymond Junior.
MATHIEU, Frantz Junior.
MICHEL, Fresner.
NUMA, Guy.
PETIOTE, Djimy.
PIERRE, Monnois.
ST VICTOR, R. Salvatory.
THELUSMA, Nicolas.
VOLCIMUS, Ismael Paul.
Òganizasyon :
NUMA, Guy - Mouvman Demokratik Popilè (MODEP).
CELESTIN, Reynold - Gwoup Refleksyon sou Pwoblèm Sosyal (GREPS)
Pou otantifikasyon
BELFLEUR, Jean Willy jeanwillybelfleur@rocketmail.com
DARBOUZE, James james_darbouze@yahoo.fr
Consulter +
