Moso nan yon kominike 22 janvye 2016 Inisyativ Pou Mete Kanpe
Mouvman Patriyotik Demokratik Popilè
Inisyativ (MPDP) vote bay AlterPresse
Devan gwo kriz malè pandye ak dezas politik ki menase peyi a ansanm ak tout mas pèp la ;
Devan gwo konplo Kò Gwoup la, gouvènman Mateli/Pòl la, KEP koupyon tèt rèd Opon an ak oligachi a ap marinen kont nasyon ayisyèn nan ;
Devan grav kriz ekonomik, finansye, politik, sosyal ak anviwonmantal, politik « tèt dwat » Mateli / Opon / Kò Gwoup la riske mennen peyi a ;
Lè nou konsidere kalite grangou, toudi ak malsite gouvènman Mateli a ak alye entènasyonal ak nasyonal li yo travay pou lage nan mitan mas yo, se yon twòkèt devan chay lamizè ak dezespwa y ap prepare pou gwo majorite popilasyon an (…) ;
Lè nou konsidere pèp ayisyen an, menm jan ak tout pèp sou latè, gen dwa leve kanpe pou defann tèt li kont tout atak ak danje ki menase egzistans li ak avni li kòm pèp lib e souvren ;
Nou menm Inisyativ MPDP, ki rasanble plizyè òganizasyon sosyal ak politik epi plizyè pati politik nou deklare :
Nou apiye ak tout fòs nou mouvman dezobeyizans AK REBELYON JENERAL divès òganizasyon politik ak sosyal deja tanmen nan tout peyi a ;
Nou soutni lide pou tabli yon GOUVÈNMAN TRANZISYON pou jete baz kòrèk pou chache solisyon ak kriz estriktirèl ak konjonktirèl peyi a ;
Men nou kwè sèl yon GOUVÈNMAN TRANZISYON DEMOKRATIK POPILÈ kapab mete pèp ayisyen an sou wout pou reprann dwa grandèt majè peyi a ak souverènte popilè a epi soulaje mizè l nan kontèks difisil n ap viv jodi a nan peyi a ;
Yon gouvènman tranzisyon ki pa rezilta mannigèt pwisans etranje, oligachi a ak gouvènman antinasyonal ak antipopilè Mateli/Pòl la ;
Yon gouvènman tranzisyon ki pran enterè peyi a ak enterè majorite popilasyon an kòm prensipal bousòl li.
Pou (…) rive fe respekte tout revandikasyon nou yo, nou mande mas popilè yo, ouvriye, peyizan, atizan, ti machann, chomè, elèv lekòl, etidyan, fanm kon gason, tout òganizasyon sosyal ak politik konsekan, rete veyatif nan 4 kwen peyi a, pandan n ap leve kanpe pou pote kole nan mouvman dezobeyizans AK REBELYON JENERAL la.
N ap pwofite voye jete vye derechany kraponay ak krazezo Polis Nasyonal la vle retounen avè l pou swiv lòd ilegal pouvwa anplas la. Nèg yo konnen derechany sa yo pa alamòd ankò, yo pa ka entimidite pèp la.
Nou pap fini nòt sa a san renouvle solidarite nou a Radyo televizyon Kiskeya, a Lilianne Pierre Paul anpatikilye, kòm senbòl kouraj ak rezistans pèp la.
Pou otantifikasyon :
Ernst MATHURIN / GRML.............................................................................................................................
Eveline LARRIEUX / SOFA .............................................................................................................................
Ollery SAINT LOUIS / Ayiti Djanm.................................................................................................................
Guy NUMA / MODEP....................................................................................................................................
Pierre André GEFFRARD / KRPBB..................................................................................................................
Consulter +
