Ti chèz ba

Oganizasyon Fanm Deside Jakmèl kondane ak tout fòs li maspinay Lapolis fè sou jounalis Gerdy Jeremie


jeudi 13 novembre 2014

Not pou laprès òganizasyon Fanm Deside

Dokiman sa a vin jwenn AlterPresse 11 novanm 2014

Oganizasyon Feminis Fanm Deside salye kouraj tout jounalis nan depatman Sidès la pou travay y ap fè, nan kontinye enfòme popilasyon an, malgre tout difikilte yo rankontre.

Fanm Deside pwofite okazyon sa a pou kondane, ak tout fòs li, zak gwo ponyèt ak maspinay Jounalis Gerdy Jeremie, prezantatris Radio Télé Express la, ki se, an menm tan, korespondan ajans AlterPresse, sibi anba men polisye Arly Alex Céus ak Jean Daniel Erickson, ki se 2 ajan nan inite depatmantal mentyen dòd (UDMO) nan komisarya Jakmèl la.

Alòske jounalis Gerdy Jérémie, nan egzèsis pwofesyon l, t ap kouvri manifestasyon, chofè taksi moto yo t ap òganize nan lari jakmèl, jou ki te lendi 10 novanm lan, pou denonse pri plak machin ki ogmante nan Direksyon jeneral enpo (DGI) Jakmèl ak ogmantasyon pri pèmi kondwi a nan sèvis sikilasyon Jakmèl la.

Polisye yo, aprè yo te fin bay anpil gaz lakrimojèn sou avni barankiya, presizeman nan zòn “St Cyr”, 2 ajan UDMO sa yo, kidonk Arly Alex Céus ak Jean Daniel Erickson, maspinen ak kout baton, kout pye, jounalis Gerdy Jérémie.

Se gras ak konkou kèk lòt kòlèg jounalis ki fè jounalis Gerdy Jérémie rive sove anba men polisye sa yo. Eta sante viktim nan trè kritik, daprè enfòmasyon nou genyen.

Fanm Deside ap poze tèt li kesyon poukisa se yon jounalis fanm 2 polisye sa yo atake, lè nou konside se sèl chofè taksi gason ki t ap manifeste ? Eske yon fanm dwe viktim maspinay, paske l ap egzèse metye li ?

Zak vyolans sa a, jounalis Gerdy Jérémie sibi anba men ajan UDMO sa yo, montre aklè kòman Fanm yo kontinye ap viktim sou tout fòm nan sosyete a, epi tout kote yo ye, anba men lapolis ki ta dwe pwoteje l.

Nan sans sa a, Fanm Deside ap egzije jistis ak reparasyon pou jounalis Gerdy Jérémie, pandan n ap atire atansyon Otorite Lajistis yo nan Jakmèl pou pran responsablitye yo nan dosye sa a.

Oganizasyon Fanm Deside mande Direktè Depatmantal Lapolis la, Komisè Divizyonè Frantz Elbe, pou pran tout mezi kont tout polisye k ap komèt zak maspinay sou moun, pandan yo bliye wòl yo, ki se pwoteje ak sèvi.

Oganizasyon Fanm Deside pote soutyen li bay tout jounalis nan depatman Sidès la, patikiltyèman jounalis Gerdy Jérémie.

« Menm dwa, menm chans pou tout moun egzèse metye yo ».

Jakmèl 11 novanm 2014

Marie Ange Noël _ Kòdonatris

Cc : Commissaire du Gouvernement Me Antoine Jean Féhaud, Chef du Parquet de Jacmel
Cc : Commissaire Divisionnaire Frantz Elbé, Directeur Départemental de la Police