Haiti
Ti chèz ba

Ayiti-Politik : SOFA kritike pratik gwo ponyet pouvwa Martelly a


Ekri jou lendi 28 oktòb 2013

Kominike pou laprès SOFA sou pratik « Eta de Dwa »
gouvènman Martelly/Lamothe

Dokiman sa à vin jwenn AlterPresse 25 oktob 2013

Solidarite Fanm Ayisyèn-SOFA konstate priyorite « Eta de Dwa » gouvènman Martelly/Lamothe manifeste sitou nan enstrimantalize lajistis pou kouvri tèt li ak zanmi li pandan l ap atake sitwayen ak sitwayèn k ap denonse koripsyon, laprès k ap bay pèp la espas pou pale, epi nan atake dirijan politik.

Lè nou sonje kouman lajistis pwoteje Mesye Evinx Daniel, yon zanmi Prezidan an, malgre tout denonsiyasyon ki fèt sou enplikasyon li nan dwòg. Lè nou sonje fason lajis ap pwoteje polisye manm sekirite Prezidan an ki te atake jounalis Rodrigue Lalanne, nou pakab pa poze tèt nou kesyon sou kalte « Eta de Dwa » gouvènman sa a vle tabli anndan peyi a.

Eske nou kab pale de « Eta de Dwa » lè pouvwa a ap fè arestasyon gwo ponyèt ak ilegal sou Mèt Andre Michel, yon avoka ki denonse devan nasyon an ak devan lajistis pratik koripsyon gouvènman an ki pran yon arete pou bay Madan Prezidan an ak pitit li jere, fèredefè nan lajan leta?

Eske se « Eta de Dwa » a ki fè Minis Jistis la soti yon kominike semèn pase a kote li deklare ak anpil detay gen konplo yon sektè nan klas politik la ap mare pou touye jounalis Jean Monard Metellus?

Eske se menm « Eta de Dwa » sa ki fè lajistis te atake jounalis Lilyanne Pierre Paul paske li te bay yon enfòmasyon konsènan Jij Lamarre Belizaire ? Eske se «Eta de Dwa » ki fè gouvènman an bay tout demonstrasyon jan l ap chèche enstrimantalize lajistis ak lapolis? Yon dènye egzanp, se kominike Prezidan konteste CSPJ a soti pou mande arete M. André Michel la ki pibliye ak adrès Ministè Lajistis. Twou manti pa fon !

Eske se « Eta de Dwa », lè gouvènman an sistematikman atravè Lapolis ak MINISTA ap tire gaz chimik jan sa fèt sou popilasyon an lè y ap manifeste, simen bal sou manifestan, jan sa te fèt nan Lestè lè sitwayen ak sitwayèn Komin sa a t ap reklame Jistis pou Jij Jean Serge Joseph kote 7 moun te blese epi youn ladan yo mouri lopital ?

Noumenm nan Solidarite Fanm Ayisyèn-SOFA lè nou konnen « Eta de dwa » vle di garanti sekirite sitwayen ak sitwayèn epi respekte lalwa, nou plis kwè pratik sa yo rantre nan estrateji gouvènman an pou simaye laterè, latwoublay, pou fè entimidasyon. Se yon tantativ pou retounen ak baboukèt nan bouch moun ki pa anbake nan machin pwopagann li a. Mannèv sa yo, se pou gouvènman Martelly/Lamothe la ak zakolit yo, kapab gen yon boulva lib devan yo pou yo fè sa yo pito onivo ekonomik, politik ak sosyal. Lè Prezidan an deklare li se chèf siprèm ; pouvwa egzekitif siperyè pase lòt pouvwa a ; se yon jan pou l jistifye fason l ap likide resous ak richès peyi a bay oligachi a ak ak militinasyonal yo. Kòm chèf siprèm ki reprezante lafòs ak pouvwa depi li rankontre yon obstak sou wout li, fòk li kraze l.

Kominike Primati a sòti pou di Palman an vyole prensip separasyon pouvwa lè yon gwoup palmantè t al fè solidarite ak Mèt Andre Michel, se yon manti, men se yon pretèks tou pou pouvwa a kapab jistifye volonte li genyen pou li kraze enstitisyon sa a ak tout fòs.

Nou pap bliye, depi Prezidan an monte sou pouvwa a, Palman an rete youn nan enstitisyon li vle disparèt pou l kab fè sa l pito. Se sa ki esplike okenn dispozisyon pa pran pou òganize l.

eleksyon yon fason pou garanti ekilib pouvwa yo. Prezidan an pa vle pyès lòt pouvwa kontwole l.

Nou konstate anmenmtan demagoji Prezidan KT-KEP, Emmanuel Menard ap fè nan pibliye kalandriye elektoral, mete BED ak BÈV anplas san pa gen yon lwa elektoral. Yon Prezidan KT-KEP, tout moun sonje, ki te chanpyon nan fè dezenfòmasyon sou rejim Divalye ak sou gouvènman panzouyis koudeta militè 1991-1994 la.

Kalte pratik gwo ponyèt, entimidasyon, laperèz sa yo sanble tèt koupe ak pratik rejim bout di Divalye a ki te kontinye apre 1986 ak Konsèy Nasyonal Gouvènman Nanfi, Regala menmjan sou Cedras, Michel Francois ak ekip Ninja yo pandan koudeta sa a.

Sa vle di, jodi a, li enpòtan pou popilasyon an konprann ak ki kalte pouvwa nou ann afè : Yon pouvwa makout-pouchis ki vle tounen ak atache, brasa woz, pou kontwole popilasyon an, pou panike nou. Yon pouvwa ki chita sou manti : manti yo pral bay limyè 24/24, manti yo voye plizyè nouvo milyon timoun lekòl, manti sou lanmò Jij Jean Serge Joseph. Kidonk se yon pouvwa ki chita sou blòf.

SOFA salye tout fòm solidarite divès sektè anfavè Jounalis Lilyanne Pierre Paul, Jounalis Jean Monard Metellus ak Mèt André Michel. Noumenm nan SOFA k ap goumen pou fanm yo patisipe nan zafè peyi a, noumenm k ap goumen pou yon sosyete egalitè, pou jistis ak pou jistis sosyal triyonfe, nou pap asepte okenn rejim otoritè. Nou pap tounen anvan 1986 ankò.

SOFA mande pou tout sektè demokratik popilè a ak tout fòs pwogresis anndan peyi a kontinye travay edikasyon popilè a. Pou elan solidarite sa a tounen yon kokennchenn mobilizasyon jeneral pou kwape deriv pouvwa a, pou yon « Eta de Dwa » demokratik tabli tout bon vre nan peyi a kote fanm kou gason kapab rive viv san kè sote, epi jwi libète endividyèl yo.

LIT FANM NAN, SE LIT TOUT MAS PÈP LA !

Pòtoprens, 25 oktòb 2013

Pou SOFA

Marie Frantz JOACHIM
Kòdonatris Jeneral