Nòt pwotestasyon ak solidarite SAKS ak Gwoup Médialternatif
Dokiman sa a vin jwenn AlterPresse 17 septanm 2013
Sosyete Animasyon ak Kominikasyon Sosyal (SAKS) ak Gwoup Medialternatif, denonse asiyasyon Jij Lamarre Bélizaire ak sipò Dwayen Raymond Jean-Michel voye bay Radyo Kiskeya ak jounalis Lilianne Pierre-Paul poutèt yon enfòmasyon piblik jounalis la difize.
Pou SAKS ak Gwoup Medialternatif, demach Jij Belizaire a se yon lòt atak kont dwa jounalis yo genyen pou chèche enfòmasyon epi bay popilasyon an enfòmasyon dapre Konstitisyon peyi d Ayiti ak Deklarasyon Inivèsèl Dwa Moun.
Demach jij Belizaire a pilonnen tou devwa pwofesyonèl jounalis ak medya genyen pou pwoteje sous enfòmasyon yo.
SAKS ak Gwoup Medialternatif kòm 2 enstitisyon patnè radio Kiskeya e k ap fè pwomosyon dwa kominikasyon ak libète lapawòl, nou gen gwo enkyetid e n ap poze tèt nou kesyon devan deklarasyon ak konpòtman otorite yo ki sanble sèmante pou yo pa respekte dwa laprès ditou.
SAKS ak Gwoup Medialternatif pote tout solidarite yo bay Radio Kiskeya ak konsè Lilianne Pierre-Paul.
Baboukèt la pap tounen !
Pòtoprens, 17 septanm 2013
Pou Medialternatif : Gotson Pierre
Pou SAKS : Sony Estéus
Consulter +
