Haiti
Ti chèz ba

Aristid pati! Ayiti dwe repati !


Ekri jou jedi 27 me 2004

Tèks sa a soti nan bilten Platfòm òganizasyon Ayisyen k ap Defann Dwa Moun (seri II, nimewo 1, mwa me 2004)

Dokiman sa a vin jwenn AlterPresse 27 me 2004

Enstiti Kiltirèl Karl Levèque, ICKL, yon enstitisyon manm platfòm nan, tanmen yon gwo kanpay sansibilizasyon nan peyi a nan koumansman mwa avril la. Tèm kanpay sa a se: Aristid pati! Ayiti dwe repati! Kanpay sansibilizasyon sa a ranmase anpil eleman ki antre nan kategori dwa ekonomik, sosyal ak kiltirèl.

Objektif la se ride mas yo reflechi sou yon ansanm dwa yo genyen kòm sitwayen tankou dwa ki makònen ak pwoblèm grangou, lavichè, chomay, edikasyon ak lasante.

Sa ki eksplike kanpay sa a?

Se desepsyon mas yo nan batay pou chanjman an ki pouse ICKL lanse kanpay sa a. Depi 7 fevriye 1986, sitwayen yo ap goumen pou jwenn yon lavi miyò ak plis jistis. Sepandan, gouvènman ki vini apre yo pa janm fè anyen pou rive chanje sitiyasyon mizè mas yo.

Daprè responsab enstitisyon an, jounen jodi a, li enpòtan pou nou koumanse poze pwoblèm k ap pèmèt mas yo konprann sa ki lakòz chanjman sa yo pa janm rive fèt nan peyi a.

Nan sans sa a, yo deside fè yon ranmase sou twa gwo tèm sa yo pandan kanpay la: Enpinite, sitiyasyon malsite mas yo ak gagòt nan byen Leta.

Kanpay sa a te louvri ak yon gwo konferans pou laprès jou ki te 20 avril 2004 la nan lokal Kay Fanm.

N ap siyale tou jounen refleksyon sou dwa ekonomik, sosyal ak kiltirèl yo ki te fèt nan Fakilte Syans Zimèn jou ki te premye me a te rantre nan kanpay sa a tou.