Haiti
Ti chèz ba

Ayiti : Pou n kwape kolonizasyon mantal Kita Nago demagojik


Ekri jou dimanch 20 janvye 2013

Powèm Joseph Harold Pierre

Dokiman sa a vin jwenn AlterPresse 18 janvye 2013

Lè ti trip ap vale gwo trip
Ayiti Toma gen kolera ak grip
On grip lamize ki soti pou kaba ak pitit tè Desalin
On grangou ki tounen on giyon
Ki tounen on bwa kajou
Byen di, di kou fè
K’ap travese trip pitit pèp la
Soti Leziwa pou rive Wanament

Gwo zotobre ki manje dòb ak woti
Sèt fwa pa jou
Pou yo pase pèp la nan joujou
Jouke l’ ak on bwa kajou
Soti nan sid pou rive nan nò
Soti nan lès pou rive nan lwès

Nan chak kwen, nan chak avni-riyèl
Kote bwa a pase, pèp la tounen pope twèl
Aloske gwo chabrak ap bwè konyak
Bay diskou pou di ane 2013 pral gen mirak

Koze mande chita
Lè bwa kajou sa a fin rive wanament
Li pral jwenn ak chemen verite l’
Chemen verite sa a se lòt bò fontyè
Kote ki gen wout, lekòl ak limyè
Adye papa! Ayayay! Tounè w!
Bwa yo fè m’ pote se bwa lamizè!
Bwa pou yo pase m’ nan betiz
Bwa pou yo fè moun wè
Men poukisa yo pa komanse mete lekòl
Le sa a tankou moun serye y’a mete kòl

Pase n’ pote bwa
Ann plante bwa
Pase pou n’ mache sòt nan sid pou rive nan nò
Ann fin ak pratik tonton Nò
Pase pou n’ mache sòt nan lès pou rive nan lwès
Ann sispann kale wès
Pase pou n’ fè teyat
Ann plante patat
Pase pou n gaspye enèji n’
Ann konstwi peyi n’

Contact : desharolden@gmail.com