Dokiman sa a vin jwenn AlterPresse nan dat 3 desanm 2012
Monwi, 3 desanm 2012.- Tèt Kole Ti Peyizan Ayisyen ouvri 3zyèm kongrè li lendi 3 desanm 2012 la nan Monwi,.
Se sou tèm : « 25 lane lit ak rezistans, peyizan an n gonfle fòs nou pou yon pouvwa popilè » kongrè a ap fèt.
Aktivite yo te kòmanse dimanch swa (2 desanm 2012) ak yon seremoni kiltirè,l kote manm Tèt Kole Ti Peyizan yo te onore memwa tout kanmarad yo ki tonbe nan batay la pandan 25 dènye lane yo.
Apeprè 400 delege, ki soti nan 10 depatman peyi a, ap patisipe nan 3zyèm kongrè Tèt Kole Ti Peyizan Ayisyen yo, pandan 3 jou, pou fè bilan òganizasyon an sou plan politik, ekonomik, kiltirèl ak òganizasyonèl.
Bilan sa a ap pèmèt manm yo gade fòs ak feblès òganizasyon an pandan 25 dènye lane yo epi defini estrateji batay yo pou lane k ap vini yo.
Kòdonatè kongrè a, Mompoint Elie, ki soti nan Federasyon Tèt Kole Plato Santral, retrase tout pwosesis ki mennen nan kongrè nasyonal la.
Dapre Elie, Kongrè nasyonal la se aboutisman divès kongrè ki te kòmanse depi lane 2011 sou bitasyon, pase nan seksyon kominal, komin ak depatman.
Woumble nasyonal la, se espas kote manm tout rejyon yo pral debat sa k te soti nan tout nivo kongrè yo, pou yo rive nan yon sèl dizon.
Bò kote pa l, Henrilus Jacques Jean, manm Komite Egzekitif Nasyonal Tèt Kole Ti Peyizan Ayisyen an, retrase listwa ak liy ideyolojik òganizasyon an.
Listwa Tèt Kole Ti Peyizan Ayisyen te kòmanse nan kòmansman lane 1980 yo ak gwoupman Tèt Ansanm yo, ki te jwenn ankadreman kèk pè pwogresis ak jèn entelektyèl ki te angaje nan batay pou chanjman sosyete a, anfavè majotrite popilasyon an ki se peyizan yo.
Apre depa diktati a an 1986, gwoupman yo vin transfòme pou tounen yon mouvman nasyonal. Jodi a, òganizasyon an prezan nan 50 komin nan peyi a ak plis pase 80 mil manm.
Konsènan liy ideyolojik Tèt Kole Ti Peyizan Ayisyen ap suiv, Jean fè konnen se yon liy demokratik popilè.
Oganizasyon an rekonèt tèt li nan gran mouvman sosyal ak popilè k ap batay pou yon transfòmasyon fondamantal nan chapant sosyete a.
Jounen lendi 3 desanm 2012 la te kòmanse ak yon analiz konjonkti.
Pwofesè Jean-Yves Blot te prezante reyalite kiltirèl la, jounen jodi a, ki domine ak relijyon k ap pouse kou djondjon nan peyi a, espesyalman nan milye riral yo.
Pou Blot, relijyon yo patisipe anpil nan demobilizasyon mouvman sosyal ak popilè yo.
Madam Alixe Pérard te pale sou konjonkti politik la.
Apre li te fin prezante sitiyasyon an kòm yon sitiyasyon malouk, li fè peyizan yo konnen sitiyasyon an kab chanje, men fòk yo mete men nan batay la.
Mouvman peyizan entènasyonal Via Campesina ak brigad mouvman peyizan san tè (Mst) Brezil, mouvman nasyonal peyizan kongrè Papay (Mpnkp), Kòdinasyon rejyonal òganizasyon Sidès (Krose) prezan nan 3zyèm kongrè nasyonal Tèt Kole Ti Peyizan Ayisyen an, k ap fini mèkredi 5 desanm 2012 la.
Sony Esteus
Sosyte animasyon ak kominikasyon sosyal (Saks)
Consulter +
