Kominike Kolektif pou dedomaje viktim kolera yo
Dokiman sa a vin jwenn AlterPresse 25 jen 2012
Kolektif mobilizasyon pou Dedomaje Viktim Kolera yo denonse ak tout fòs li, arestasyon ak anprizonnman Oxygène David ak Charles Dukens ki se 2 manm MOLEGHAF, yon òganizasyon ki andedan Kolektif la. Lapolis fè arestasyon sa a, nan moman manm MOLEGHAF yo t ap fè yon sitin kont chomaj, grangou ak lavichè, devan afè sosyal, madi 19 jen ki sot pase a.
Yon lòt fwa ankò, pouvwa a kontinye ap montre vrè vizaj li, lè li pran plezi ap arete moun k ap mobilize kont grangou, mizè ak chomaj. Alòske pouvwa a pretann l ap batay kont grangou ak chomaj. Arestasyon militan MOLEGHAF yo rive nan yon moman kote bri ap kouri pou di ministè enteryè ak MINISTA ta gen nan men yo yon lis wouj ki gen ladan plizyè militan pwogresis pou yo kraponnen oubyen elimine. Sanble se nan kad plan sa a 2 kanmarad MOLEGHAF yo jwenn arestasyon yo. Nou tout konnen pratik makout yo gen tèt rèd, men nou konnen tou peyi a gen fanm ak gason vanyan ki pap kwaze bra devan konpòtman fachis pouvwa ki gen foli makout.
Kolektif Mobilizasyon pou Dedomaje Viktim Kolera yo, denonse epi kondane pratik gwo ponyèt sa yo. Kolektif la mande pouvwa anplas la ak lajistis, pou yo libere kanmarad Oxygène ak Charles Dukens san pèdi tan. Kolektif la kore kare bare tout mobilizasyon k ap fèt pou jwenn liberasyon kanmarad yo. Se nan sans sa a, Kolektif la mande manm li yo, lòt òganizasyon konsekan, fanm ak gason vanyan nan katye popilè yo, pou yo pote kole nan pwochen sitin MOLEGHAF ap fè, madi 26 jen k ap vini la a 10zè tapan, devan afè sosyal.
Pou Kolektif la
James Beltis
Jean Evrard Jean Charles
Guy Numa
Jean Willy Belfleur
Yves Pierre-Louis
………….
Kolektif pou dedomaje viktim kolera yo gen ladan l : Batay Ouvriye, Tèt Kole Oganizasyon Popilè yo, UNNOH, MODEP, MOLEGAF, KRD, Sèk Gramsci, GREPS, Chandèl, AVS, Bri Kouri Nouvèl Gaye, ACREF, DOP, AKP
Consulter +