Haiti
Ti chèz ba

Lonè respè Lolo

Omaj pou Marie Laurence Jocelyn Lassègue
Ekri jou lendi 8 mas 2004

Rebecca Guillaume Pierre-Louis

Dokiman sa a vin jwenn AlterPresse 8 mas 2004

Bon, Jodi a mwen vle rann omaj a youn grenn fanm nan peyi dayiti. Sa fè twò lontan mwen anvi ekri pou-m di sa m panse de li. Se pa lòt fanm ki pa genyen non. Hm Hm Pa di tou. Si se pou sa depi epòk KOFALA ak Kay Fanm nan ane 80, fanm yo te la. Sim ta pran poum pale de fanm lakay, kap fè bon bagay ke m konnen se vre lis la pa tap twò long men m tap gen anpil non pou m nonmen. Men anpil nan yo se zanmi m, se moun pa m, se sè m, se fanmi m, se Didi m; Yo konnen degre respè m ak konsiderasyon m pou yo.

Men panse m jodi a ale pou youn lòt fanm, youn fanm ke m pat menm reve ki te nan batay, youn fanm tchilitchitchi, dyòl loulouz, youn fanm tou enteresant. Lè lap pale mte menm kwè li pat konn pale kreyòl. Youn fanm , L O L O.

Lolo, Respè pou ou Fanm. S espantan m espantan sou ou, men jodi a mwen reyalize. Ou se youn moso nan limyè sou wout fanm an ayiti. Mèsi pou lonè fanm ou kenbe Lolo, mèsi pou respè.

M konnen ou ka sezi wè m ekri w, nou pa zanmi; Menm lè mwen toujou apresye w e respekte w, Ou toujou montre m konpreansyon w ak respèw, Nou pat janm zanmi epi zanmi alèkile pa kenbe, m pa kwè nou younn te blije zanmi lòt pou mwen respekte w.

Menm jan ou respekte tèt ou.

M pa konn si se lè m ki rive pou m ale. M pa ta renmen ale san m pa di w : Lolo, ou se youn fanm total. Mwen rekonèt ou an 1987, lè sa-a ou te youn bon fanm jounalis. Ou pat janm kouri ekri sa yo rapòte w san w pat verifye; ki di donk, ou pat la pou tripotay ni eskandal.

Se pou tèt sa, e depi lè sa a, mwen admire w. Se pa ni pou bèl fidji ni pou lajan ou menm pa pou lamitye M pa konn pouki men anpil fwa biskèt mwen frape sou ou. Chak kou m ap gade peyi m, mwen sonje ki kalite konpetans ou ye, mwen rete mwen plenn. Ou wè sim te prezidan Lolo, m t ap chache w kèlkeswa kote ou ye. M pa kache di w menm si yo ta di m tiran, m t ap fè gwo presyon sou ou pou mete w devan responsabilite w. M t ap kontinye prije w tankou an 90, m t ap itilize kalite konpetans ou sa a pou 200 an listwa pa pase nan betiz, pou l bèl epi byen pran. Se sa ki ta bon pou peyi a vanse.

Si yap mande pou Fanm, Fanm yo la ak ou menm Lolo. Men sa pou m fè, lè m pale, yo di m se atis.

M pa kwè ni fanm ni gason nan peyi dayiti reyalize ki kalte fanm ou ye L O L O. M ap ekri ak dlo nan je, fò w ta di se dènye fwa m ap pale ak ou.

Ou petèt, se paske nou pa abitye kite kè nou pale konsa, e lè-n resi fèl, nou wont nou te kenbe two lontan sa n santi.

Antouka Lolo, m di w li, m pap toufe avè l. Msezi wè jan ou gen bon jan konviksyon san vye logèy tèt chat. Lè pou w pale ou pale san rayisman nan kèw, se pa sa tout moun ka fè.
Kenbe la lolo. Kenbe fanm. Sa pa fouti youn bagay ou pran lekòl, Se respè feminin nan ou devlope lakay ou Lolo. Toutan ou rete konsa, w ap merite estim tout fanm.

Rebecca Guillaume Pierre-Louis