Kominike Kowalisyon Ayisyen pou Lajistis
AlterPresse resevwa dokiman sa a 19 fevriye 2004
Koalisyon Ayisyen Pou Lajistis leve kanpe kont mannnigans restan pouvwa lavalas la tanmen pou fè lame etranje okipe peyi a. Demach sa yo se bonjan prèv : lwa pouvwa ki danse nan tèt Aristid la tèlman dechennen li fè Aristid mete tèt li pi wo pase dwa grandèt majè peyi a.
KAJ ap denonse konpòtman otorite lavalas yo ki sòti pou yo foure peyi a nan katchouboumbe olye yo wete kò yo sou pouvwa a. Mete sou mizè, kout baton, kout fizi ak kriz san rete lavalas pote pou pèp Ayisyen an, jodia se dwa grandèt majè peyi a lavalas sòti pou l chifonnen dekwa pou l eseye maske echèk politik li sou pouvwa a.
Anplis, lavalas pa gen pyès pwobèm pou l ta bay pèp Ayisyen yon dezyèm entèvansyon militè etranje ( premye a se te okipasyon meriken 1994) kòm kado pou 200 lane lendepandans peyi a. Sa montre aklè lavalas se yon pouvwa enkapab, antinasyonal ak anti pèp.
Devan sitiyasyon sa a, Koalisyon Ayisyen pou Lajistis deklare :
1. Pèp Ayisyen andedan kou deyò pa vle entèvansyon militè, kit se pou kore Aristid sou pouvwa a, kit se pou kwape l ;
2. Avèk ou san entèvansyon militè etranje, Pouvwa lavalas la pa fouti rekanpe doubout, sèl grenn chwa Aristid rete se kite pouvwa a.
3. Tout solisyon derechany pou kriz peyi a ki pa chita sou enterè ak revandikasyon fondalnatal mas pèp Ayisyen an (jistis sosyal, refòm agrè, jistis, patisipasyon ak kontwòl popilè eltÂ… ) ap kanpe nan wout.
Nouyòk, 17 fevriye 2004
Pou Koalisyon Ayisyen pou Lajistis :
Daniel Biko
Alain Zéphyr
Consulter +
