Kominike Batay Ouvriye
Dokiman sa a vin jwenn AlterPresse 20 oktob 2011
Apati apèl Kolektif mobilizasyon pou dedomaje viktim kolera kote Batay Ouvriye patisipe, anviwon 400 moun te mobilize jou ki te 19 oktòb pase a pou pwoteste kont prezans MINISTA nan peyi a.
Se jou sa a ki te chwazi etan done dat sa a make yon lane depi prezans ak move fonksyonman batayon Nepal MINISTA a, ki te jete matyè fekal kontamine li nan Latibonit la, te pèmèt epidemi kolera a te pwopaje nan peyi a. Jan tout moun konnen, epidemi sa a fè ravaj nan peyi a kote, apati enkonpetans otorite Leta yo, non sèlman li po ko janm fin kontwole, men viktim yo pa janm ka jwenn dedomajman.
Met sou tout lòt zak vyòl, vòl, labèlvi ak ekzaksyon tout kalite..., manifestan yo t ap denonse enkonpetans Minista kote apre latè tranble 12 janvye a, yo pa t fè anyen serye pou ede popilasyon an. An reyalite, se paske se represyon ak laterè fòs politik ak militè l ONI sa yo ap aplike nan peyi a, nan kad yon okipasyon-titèl mele ak imilyasyon.
Deklarasyon Kolektif la (...) denonse sitiyasyon sa a, pandan l ap egzije reparasyon sou tout longè pou viktim kolera a epi depa Minista a sou teritwa peyi d Ayiti.
Men, sa k fè yo pa ka jije Minista? Sa k fè otorite yo pito pwoteje l nan pa janm denonse fòmèlman tout ekzaksyon li yo? Se paske kòd lonbrit MInista mare ak gwo konpayi enperyalis yo, gwo boujwa restavèk, grandon ak granmanjè tout kalite. Se YO Minista ap defann. Egal: otorite yo ak Minista, se kabrit Tomazo, menm plim menm plimay, kote dominasyon ak represyon sou mas popilè yo ak travayè yo an patikilye, se sa fòs l ONI sa yo vin regle, nan defans pwojè neo-liberal lespwatasyon-salè-mizè, salè pwatrinè nou konnen an.
Se sa k fè, nan yon sèl vwa, tout manifestan yo t ap pwoteste tou kont refòmasyon lame represif-kraze-zo nou te konnen an e ke nouvo otorite yo vle refoure nan gagann nou. Se pral menm represyon an toujou, sou menm mas popilè ak travayè yo menm jan an, jan sa te toujou fèt.
Deklarasyon Batay Ouvriye a (...) mete lòt aspè sa yo aklè tou.
Manifestasyon an te tèmine nan simityè kapital la kote yon sèkèy ki senbolize Minista te boule kòm senbòl degou ak refi total kapital nou.
N ap pwofite okazyon an pou mande tout militan, tout pwogresis konsekan ranmase karaktè nou: sa k ap vini a, se lanmò!
Batay Ouvriye
Consulter +
