<

Ayiti : Manifestasyon nan Pòtoprens pou 1 an epidemi kolera

Kominike Kolektif Mobilizasyon pou Dedomaje Viktim Kolera yo

Dokiman sa a vin jwenn AlterPresse 18 oktòb 2011

Nan okazyon yon lane depi Kolera ap taye banda nan peyi a, epi nan kad operasyon pou deboulonnen MINUSTAH-KOLERA, Kolektif Mobilizasyon pou Dedomaje Viktim Kolera yo envite pèp ayisyen an nan yon gwo manifestasyon l ap òganize mèkredi 19 oktòb la Pou :

- mande depa MINISTA san pèdi tan.
- Mande nasyonzini repare tout viktim kolera, kadejak ak represyon MINISTA fè nan peyi a.
- mande kay pou moun ki anba tant yo.
- Mande tè, zouti ak angrè pou peyizan yo travay.

Manifestasyon 19 oktòb la jwenn apwi divès lòt òganizasyon nan sosyete a. Manifestasyon sa a ap soti Fònasyonal pou pran wout Sanfil, kafou peyan, sen maten, ri doktè Obri, pèpetyèl, montalè, ri pave-lali, limyè lali, ponmoren, bwavèna, avni Mayi, ri sentonore, Osvaldiran pou rive bò simityè pòtoprens, kote Kolektif la pral li deklarasyon 19 oktòb la devan laprès.

Tout pitit, Desalin, Chalmay Peral, Benwa Batravil, tout moun ki kwè nan dwa granmoun peyi a, zansèt nou yo te mouri kite pou nou an, ouvriye, peyizan, ti machann, chomè, anplwaye revoke, pwofesè, etidyan, elèv lekòl, fanm ak gason vanyan nan katye popilè yo, nou tout dwe pote kole nan manifestasyon 19 oktòb la, pou tout viktim Minustah-Kolera-Kadejakè yo jwenn jistis ak reparasyon, pou Minustah kite peyi a. Randevou kase nan Fò-Nasyonal a 9vè nan maten. Manifestasyon an ap kòmanse ak yon mès nan Fònasyonal nan lonè tout viktim Kolera yo. Nan mitan mès la, ap gen yon sèkèy ki pote kadav MINISTA-KOLERA-KADEJAKÈ.

Aba okipasyon / CIRH / Bill Clinton !

Aba machann peyi !

Viv lit pèp la ! Viv yon Ayiti Granmoun !