Kominike Regwoupman Demokratik Popilè (RDP)
AlterPresse resevwa dokiman sa a 4 fevriye 2004
Nou menm ansanm òganizasyon ak enstitisyon ki andedan Regwoupman Demokratik Popilè (RDP), nou pote tout solidarite nou ak Près endepandan an ki vrèman anba konprès nan men rejim bout di Lavalas la, yon rejim nou kalifye kòm rejim sanginè, òlalwa. Nou konstate menas kont jounalis endepandan ki sòti bò kote pouvwa a ak patizan l yo pran plizyè fòm tankou: Trak, kout telefòn anonim, jouman, agresyon fizik, montaj pou detwi pèsonalite yo, elatriye.. Non sèlman gen menas fizik ak sikolojik ki fèt sou jounalis yo, medya kote jounalis yo ap travay viktim gwo siklòn lavalas jou lendi 13 janvye 2004 la, yon siklòn plizyè ofisyèl nan gouvènman an tankou : Mario Dupuy, Marie-Antoinette Gauthier ak Nahoun Marcellus te gentan anonse plizyè jou avan.
Dènye gwo menas sikolojik Jounalis medya endepandan yo resevwa se : konplo Mesye Bery, ki sòti nan baz sezaryèn denonse nan mikwo Radyo Kiskeya jou Samdi 31 janvye 2004 la, kote li mete deyò, yon plan makab Pouvwa lavalas la ak patizan l yo genyen pou sasinen plizè jounalis medya endepandan nan kapital la, nan semèn 1e pou rive 7 fevriye 2004. Nou menm òganizasyon ak enstitisyon nan Regwoupman Demokratik Popilè, nou pran dènye menas sa yo trèzoserye. Menas sa yo fè n sonje kòman Majistra Bony Dumay te anonse zero tolerans Aristid la sou Jounalis Brignol Lindor, nan radyo Eco-2000, Ti Gwav. Epi kòman lòd kriminèl sa a te egzekite kont jounalis la. Yon dosye lajistis mete nan tiwa, « lankèt se pousui ».
Se poutèt sa, nou menm òganizasyon ak enstitisyon nan Regwoupman Demokratik Popilè nou renouvle angajman nou pou nou konbat diktati Lavalas-Aristid la ak tout lòt agranman k ap vin mete baboukèt nan bouch laprès, nan anpeche jounalis egzèse pwofesyon yo lib e libè nan lide pou garanti dwa pou moun jwenn bon jan enfòmasyon epi dwa pou moun bay dizon yo sou fason politik dwe fèt nan peyi a.
Regwoupman Demokratik Popilè kwè, nan okenn peyi sou la tè, pa ka gen pwogrè san libète laprès, libète asosyasyon, libète reyinyon ak manifestasyon. Nan sans sa a, n ap goumen jouk mayi mi sou beton an pou n kontinye goumen kont tout près ki vle bloke pawòl ak enterè pèp la.
Regwoupman Demokratik Popilè ap voye yon gwo kout chapo pou tout medya endepandan, tout Jounalis ki vle respekte etik metye a, tout asosyasyon jounalis, tout radyo kominotè yo pou rezistans yo nan batay bò kote Pèp Ayisyen an k ap goumen pou yon demokrasi reyèl, epi Regwoupman an mande pou yo pa pran nan okenn zak entimidasyon pouvwa sanginè, Olalwa. Pandan n ap ankouraje plis konbativite lakay chak grenn jounalis ki pa danse kole ak pouvwa sanginè Lavalas la.
Viv yon près endepandan, viv li bète la pawòl ak dwa pou moun manifeste lib
Aba diktati, rejim òlalwa Aristid la
Viv yon mouvman demokratik popilè
ABA TOUT KALTE DIKTATI
Pou otantifikasyon :
Antonal MORTIME, RERKA
Carole P.P JACOB, KONAP
Consulter +
