Kominike SAKS ak AMEKA nan dat 14 mas 2011
Sosyete Animasyon ak Kominikasyon Sosyal (SAKS) ak Asosyasyon Medya Kominotè Ayisyen (AMEKA) kondane san rezèv deklarasyon menasan ak konpòtman agresif kandida pou Prezidan Michel Joseph Martelly kont jounalis ki t ap poze l kesyon nan deba GIAP mèkredi 9 mas 2011 lan.
SAKS ak AMEKA gen plis enkyetid toujou lè Mesye Martelly te lonje dwèt sou kòdonatè Gwoup Medyaltènatif la, jounalis Gotson Pierre, kòm moun ki pa renmen l. Eske sa ta vle di tout moun ki pa renmen oubyen ki pa dakò ak Mesye Martelly se lènmi l?
SAKS ak AMEKA ap fè kandida Michel Joseph Martelly sonje ane sa a fè 25 lane depi pèp ayisyen an te dechouke rejim diktati Duvalier a ki te mete baboukèt nan bouch laprès e ki pa t aksepte opozisyon. Pandan 25 dènye ane yo, pèp ayisyen reziste kont tout kalite lòt pouvwa militè tankou sivil ki te eseye mete baboukèt nan bouch Laprès ak lòt sektè òganize nan peyi a. Tan diktati a ale, li ale nèt!
Chimen bouton, chimen maleng, se poutèt sa Sosyete Animasyon ak Kominikasyon Sosyal (SAKS) ak Asosyasyon Medya Kominotè Ayisyen (AMEKA), de (2) òganizasyon k ap batay pou Dwa kominikasyon ak libète lapawòl blayi nan peyi a, di kanmarad Gotson Pierre, yo solidè avèk li epi mande sektè pwogresis yo pou yo pran nòt sou konpòtman kandida Michel Joseph Martelly ki se yon move siyal pou lit demokratik ak popilè a nan peyi a.
Pou AMEKA:
Mie Guyrleine JUSTIN
Sekretè Egzekitif
Benoit SILENCIEUX
Kòdonatè Adjwen
Pou SAKS: Sony ESTEUS
Direktè
Consulter +
