Kominike AlterPresse resevwa 15 janvye 2004
Gwoup Refleksyon pou mete kanpe Fwon Nasyonal Popilè Ayisyen estomake devan atak bosal pouvwa lavalas konwonpi, machann peyi fè sou emetè divès estasyon radyo nan kapital la jou ki te 13 janvye 2003 a. Atak bosal sa a, milisyen/atoufè lavalas fè sou emetè yo ak tout lòt vye zak lavalas deja fè nan peyi a tankou : atak sou Inivèsite a, vyolans reyaksyonè atoufè lavalas yo ap egzèse sou popilasyon nan Gonayiv, Plato Santral, Nò, Nòdès ak nan Miragwà n montre aklè modèl rejim konwonpi Aristid la se Divalye, Rawoul Sedras, Michèl Franswa elatriye.
Pou soti peyi a nan kalfou makawon sa a, gwoup refleksyon pou mete kanpe Fwon Nasyonal Popilè Ayisyen kwè, premye etap batay la se mobilize pou voye Aristid ale pou garanti respè libète piblik yo. Apre etap sa a, fòk batay la rapousib jouk nou rive nan chanjman kondisyon lavi mas yo.
Men poukisa Gwoup Refleksyon pou kanpe Fwon Nasyonal Popilè Ayisyen an kwè etidyan, pwofesè, peyizan, ouvriye, ti machann, chomè ak popilasyon an anjeneral dwe mobilize pou fòse rejim lavalas/Aristid la kite pouvwa a epi jije l:
1) Aristid dwe kite pouvwa a paske l lage gang ame nan peyi a pou kidnape, vyole, touye teyorize, oswa maspinen tout moun ki pa dakò ak li
2) Aristid dwe kite pouvwa a paske l kraze tout enstitisyon Leta yo tankou : lapolis, lajistis, inivèsite elatriye Â…
3) Aristid dwe kite pouvwa a paske l ap met baboukèt nan bouch laprès
4) Aristid dwe kite pouvwa a paske rejim lavalas la fè peyi a tounen yon simityè kote lavi moun pa gen okenn valè.
5) Aristid dwe kite pouvwa a poutèt l ap detwi pwodiksyon nasyonal la nan aplikasyon plan neyoliberal la. Sa ki fè lavichè fin pete fyèl mas yo
6) Aristid dwe kite pouvwa a poutèt l ap wete tè ki ka fè manje nan men peyizan pou fè zòn Franch tankou sa deja fèt nan Pitobè
7) Aristid dwe kite pouvwa a poutèt li mete ak akolit li yo pou dechèpiye lajan malere ak malerèz ki te nan koperativ bidon yo
8) Aristid dwe kite pouvwa a poutèt li mete ak akolit li yo pou piye kès Leta a epi peye chimè ak lajan taks pèp la
Nan sans sa a, Gwoup Refleksyon pou mete kanpe Fwon Nasyonal Popilè Ayisyen kwè batay pou voye Aristid ale a, se yon batay kont diktati, enpinite, kraze zo ak plan neyoliberal pouvwa lavalas la ap aplike nan peyi a. Batay sa yo dwe kontinye kont kelkeswa pouvwa ki gen lwa diktati danse nan tèt li epi k ap aplike menm plan lanmò Aristid la.
Oganizasyon ki nan Gwoup Refleksyon pou mete kanpe Fwon Nasyonal Popilè Ayisyen an :
• Mouvman Revolisyonè Ayisyen ( MRA )
• Regwoupman Oganizasyon Popilè Granmoun yo
• Mouvman Inisyativ Api Popilè ( MIAP )
• Komite Inisyativ Jèn Machan Desalin ( KIJD )
• Gwoup Refleksyon ak Aksyon Patriyotik ( GRAP )
• Efò ak Solidarite pou konstui yon Altènativ Nasyonal Popilè ( ESKANP )
• Mouvman Inite Pèp Okay ( MIPAK )
• Fwon Rezistans pou Refòm Inivèsite Leta a ak Transfòmasyon sosyete a
• Rasanbleman Militan Solidè Otwou ( RAMSO )
• Kòdinasyon Rezistans Grandans ( KOREGA )
• Mouvman Fanm Latibonit pou Devlopman ak Lavi Miyò ( MOFADEM )
• Komite Jèn Sitwayen Sen Michèl Latalay ( KOJESMA )
• Rasanbleman pou yon Mouvman Pwogresis Popilè Latibonit ( RAMPA )
• Konbit Oganizasyon Peyizan (KOP )
Pou otantifikasyon :
Joseph J. Jasmin
Guy Numa
Polycape Westner
Paul André Garçonnet
Consulter +
