Not pou laprès Sendika Travayè Anseyan Inivèsite Ayiti( STAIA)
Dokiman sa a vin jwenn AlterPresse 17 novanm 2010
Sendika Travayè Anseyan Inivèsite Ayiti (STAIA) denonse epi kondane gro zak represyon fòs okipasyon an(MINUSTAH) fè jou ki te lendi 15 novanm nan vil Okap lan kote yo touye de manifestan anba bal. Represyyon sa yo fèt sou manm popilasyon an ki t ap mobilize nan vil Okap ak Ench pou mande fòs okipasyon an bay peyi a. Manifestasyon yo tanmen aprè epidemi kolera fin gaye nan plisyè depatman nan peyi a epi fè pase 1000 mò. Yon maladi ki ta sanble rive nan peyi a avek yonn nan kontenjan MINUSTAH yo nan depatman Atibonit la.
Pandan gouvènman restavèk Preval-Bellerive la refize fouye zo nan kalalou pou fikse responsabilite nan dosye sa a, fòs okipasyon (MINUSTAH) an deside fè fas kare ak gwo zam fann fwa avèk popilasyon sivil la k ap reklame dwa granmoun li. Se nan sans sa a, yo reponn manifestan yo ak gaz lakrimojèn epi bal. STAIA bay pouvwa Preval la responsab zak entimadasyon ak asasinay sa yo ki toujou dispoze defann enterè enperyalis yo ki gen bra ame yo nan peyi a depi 2006 kont dwa grandet e enterè majorite popilasyon an. Se nan anbyans sa yo militan Janil Louis Juste tonbe nan kondisyon ki p a klè, lapolis reprime manifestasyon pwofesè yo jouk nan san kamarad Jean Philbert Louis jou ki te 8 oktob pase a. Se pou sa tou, fòs okipasyon an ak lapolis toujou reprime tout leve kanpe etidyan, ouvrye, sektè progresis yo pou mande lavi miyò pou mas yo. Lanmò sitwayen sa yo dwe tounen gazolin nan motè machin mobilizasyon kont okipasyon ak kont estabilizasyon lamizè mas yo.
STAIA ap mande sektè progresis yo pou mete fòs yo ansanm pou konbat okipasyon ak tout fòm eksplwatasyon.
Potoprens nan dat 17 novanm 2010
Pou STAIA,
Gaspard Leunique
Renel Exentus
Louis Alvares
Consulter +
