Haiti

Ayiti-Gouvènman : Apre Daniel Rouzier, Gousse pa pase kòm premye minis


mèkredi 3 out 2011

Pòtoprens, 3 dawou 2011 [AlterPresse] --- 16 senatè, ki andedan gwoup palmantè platfòm “Inite” ak lòt eli Ki pote non Gpr, vote kont chwa Bernard Honorat Gousse pou ta vin premye minis nan premye gouvènman prezidan Michel Joseph Martelly.

Sa pase madi swa 2 dawou 2011 lan, apre yon seyans prèske 8 èd tan, kote palmantè kont Gousse yo pa brinding sou demann lòt senatè yo poy yo chanje pozisyon.

Apre Daniel Gerad Rouzier, se dezyèm fwa lachanm pa asepte chwa Martelly te fè pou Gousse ta vin chèf gouvènman.

Premye fwa a, se chanm depite a ki pa t dakò ak Rouzier. Fwa sa a, se sena a ki di li pa asepte Gousse.

Komisyon espesyal 9 manm senan a , ki t ap etidye papye Gousse te remèt yo, pa jwenn bagay kwochi nan pyès ansyen minis jistis ak sekirite piblik ant 2004 pou rive 2006, sou gouvènman Boniface Alexandre / Gerard Latortue.

Men, komisyon espesyal la fè konnen gen pwoblèm nan papye Gousse remèt kòm sètifika dechay la, sa vle di papye ki di li pa t fè okenn bagay dwòl detan li te minis.

Olye se yon komisyon ki gen senatè ak depite, se pito prezidan Alexandre ki te bay Gousse sètifika “bon jesyon’ sou baz yon dekrè 1983, ki depaman ak Konstitisyon 29 mas 1987 la.

Pou rezon sa a, komisyon espesyal 9 manm sou dosye Gousse la mande pou asanble senatè yo pran desizyon yo panse ki kòrèk la.

Seyans madi 2 dawou a te chita sou posiblite pou asanble senatè yo dakò ak fòm rapò komisyon espesyal la remèt la.

Komisyon espesyal la pa fè okenn rekòmandasyon, yon desizyon ki depaman ak regleman fonksyonman sena a, dapre senatè ki pa nan gwou 16 senatè kont Gousse yo.

Prezidan sena a, Jean Rodolph Joazil, ki se manm “Inite”, te pito deside pou senatè yo rapouswiv diskisyon yo, olye yo retounen rapò a bay komisyon espesyal la pou l mete rekòmandasyon an.

Gwoup 16 palmantè kont Gousse yo pa asepte okenn nan lide lòt senatè yo ki te vle fè yo konprann desizyon sou chwa yon premye minis, se ta yon vòt teknik. Kòmkwa, se nan seyans sou deklarasyon politik jeneral yon premye minis, pou ta gen yon vòt politik.

Rive 10 è nan aswè, madi 2 dawou 2011 la, senatè Joazil pa mande kòlèg li yo vote sou sa rapò komisyon espesyal 9 manm lan di. Joazil mande yo èske yo dakò pou Gousse vin premye minis.

Okenn senatè (sou 30 chanm sena a genyen) pa vote yo dakò. Pa t gen okenn senatè ki asteni yo. Prezidan chanm sena a limenm pa gen dwa vote.

Finalman, se 16 senatè (gwoup Inite ak lòt eli yo) ki vote kont desizyon pou bernard Honorat Gousse ta pase kòm nouvo chèf gouvènman.

Michel Martelly, 16 senatè sa yo te avèti, pral gen pou chwazi yon twazyèm moun pou vin premye minis, apre chita pale ak fòs politik ki nan chanm depite ak sena a.

Eske Martelly ap kite li rive nan 3 premye mwa l oubyen nan 100 premye jou l kòm prezidan peyi d Ayiti, san li pa gen gouvènman?

Se nan dat 14 me 2011 ansyen chantè a te monte kòm nouvo prezidan peyi d Ayiti nan plas Rene Garcia Preval ki fè 2 manda kòm prezidan (1996 pou rive 2001, ak 2006 pou rive 2011) [rc apr 3/8/2011 10:00]