Haiti

Ayiti -Ekonomi : Gaz monte


jedi 24 mas 2011

Pòtoprens, 24 mas 2011 [ AlterPresse] --- Gouvènman Ayisyen an monte pri gaz, aprè pri petwòl la fin monte sou mache entènasyonal la, daprè sa Ministè Ekonomi ak Finans anonse.

Gazolin 95 lan pase a 200 goud epi gazolin 91 lan ap vann 195 goud. Gazòy la koute 162 goud epi kewozèn nan van 161 goud. Nouvo pri sa yo fikse depi 23 mas, daprè sa minis ekonomi an, Ronald Baudin fè konnen nan yon konferans pou laprès.

Pri diferan pwodui sa yo ogmante kèk jou sèlman aprè dezyèm tou eleksyon prezidansyèl ak lejisslatif yo.

« Se pa paske nou rive nan finisman manda nou ki fè nou pran desizyon sa. Nou pran l paske si nou te kenbe nou pa t ap montre nou gen sans reskonsablite », daprè sa minis la di.

Minis la fè konnen sibvansyon gaz la koute Leta ayisyen 2.6 milya goud pou yon ane.

Ogmantasyon pri gaz la pral gen konsekans sou pri divès pwodui moun pi bezwen chak jou.

Sa fè kèk moun sonje sitirasyon ki te genyen an 2008 lè te gen gwo leve kanpe akòz grangou yo te rele « grangou klowòks » nan epòk sa a. [bd gp apr 24/03/2011 04 :00]