Haiti

Yon lòt moman politik an Ayiti


jedi 5 novanm 2009

Pòtprens, 4 nov. 09 [AlterPresse] --- Haiti ap viv yon lòt moman politik ak evènman ki koumanse rive depi semen pase, lè sena a mete premye minis Michèle Pierre-Louis atè epi prezidan René Préval chwazi minis planifikasyon Jean Max Bellerive pou dirije pwochen gouvènman an.

Aktyèlman, demach yo koumanse pou Bellerive kab pran mayèt la. Li depoze dokiman li 4 novanm nan sena a pou yon komisyon espesyal kab verifye pyès li epi apre sa pou asanble sena a ratifye oubyen rejte chwa a.

Se menm demach yo Bellerive gen pou fè nan chanm depite a tou.

Si ratifikasyon chwa a fèt nan 2 chanm yo, Bellerive ap gen pou fòme gouvènman l epi prezante deklarasyon politik jeneral li devan 2 chanm yo separeman tou. Si tou 2 apwouve l lè sa a misye ap antre an fonksyon.

Men, depi kounye a, jan sa toujou fèt nan moman sa yo, bri ap kouri sou minis ki prale ak minis k ap rete. Dapre enfòmasyon ki soti nan kèk sous moun kab fè konfyans, minis ki pwòch Michèl Pierre-Louis yo pa ta dwe rete, tandiske gen plizyè moun ki te travay dirèkteman ak Preval ki ta dwe antre nan nouvo gouvènman an.

Prezidan sena a, Kelly Bastien, di li espere 18 novanm pap pran peyi a san yon nouvo gouvènman.

Kesyon vid pouvwa a ak enstabilite a, se yonn nan preyokipasyon ki parèt bò kote kominote entènasyonal la. Etazini, Lafrans, Kanada ak Nasyonzini montre yo gen tèt chaje pou peyi a pa rete lontan san gouvènman epi pou pwogram ki te koumanse ap devlope pa bloke.

Yo salye jefò yo wè gouvènman Michèle Pierre-Louis a te fè. Yo fè sonje, lè Pierre-Louis te rive sou pouvwa a, peyi a te fèk sibi kokenn katastwòf apre plizyè siklòn te fin frape l.

Nan opinyon piblik ayisyen an, gen sektè ki montre dosye sa a pa enterese yo, men gen anpil vwa ki leve kont fason sektè dominan nan pouvwa a aji pou jete gouvènman Michèle Pierre-Louis a. Yo wè men prezidan René Préval nan sa ki pase a, lavèy yon ane elektoral enpòtan k ap koumanse ak eleksyon lejislativ, k ap fini ak eleksyon prezidansyèl, anpasan pa eleksyon minisipal ak lokal. [gp apr 04/11/2009 20 :00]