Haiti

Pwen cho semèn nan : Rezilta senatoryal pasyèl yo fann KEP a


madi 28 jiyè 2009

Pòtoprens, 25 jiyè 09 [AlterPresse] --- Eskandal pete ak akizasyon visprezidan Konsèy Elektoral Pwovizwa a (KEP), Rodol Pierre, kont prezidan an, Frantz Gérard Verret, li di ki fè kont mal taye nan rezilta eleksyon yo.

Rodol Pierre pa obtanpere devan iltimatòm Verret te ba li pou li tounen sou deklarasyon li te fè yo. Okontrè li foure klou a pi fon. 8 lòt manm konsèy la pran yon rezolisyon kote yo retire Rodol Pierre nan pòs visprezidan an.

Men nan mitan sektè politik yo pawòl ap bouyi. Plizyè pati koumanse mande pou gen eklèsisman ki fèt sou sa ki pase reyèlman ak rezilta dènye senatoryal pasyèl yo, ki bay pati ki sou pouvwa a, Lespwa, 6 pòs sou 11 ki te disponib nan kous elektoral la.

Nan kesyon sekirite, dosye direktè jeneral lapolis la, Mario Andrésol toujou devan sena a apre desizyon prezidan René Préval te pran pou remete misye nan pòs direktè jeneral la.

Nan lajistis, plizyè kondanasyon moun ki te akizasyon bandi pwenn fè pa sou do yo, pami yo yonn yo te konnen anpil, se William Baptiste, ki gen ti non Ti Blan, ki pran 14 an prizon.

Men lòt konfrè li, Evens Jeune (Ti Kouto) ki te gen dosye l monte men wotè, mouri anba maladi nan prizon, dapre sa òganizasyon dwa moun yo konfime.

Nan kesyon jistis toujou, 23 jiyè ane sa a fè 22 an depi ti peyizan ap mande pini kriminèl ki te fè masak Jan Rabèl an 1987.

Zafè salè minimòm poko rive nan konklizyon. Apre objeksyon prezidan René Préval te fè sou lwa palman an te vote pou ogmante salè minimòm nan a 200 goud, semèn sa a, nan yon lèt li voye bay 2 chanm yo li mande pou dyalòg la kontinye. [gp apr 25/07/2009 13 :00]