Haiti

Ayiti/Anviwónman: Lapli yo bay kè sote


mèkredi 4 mas 2009

Gouvènman an gen on pwojè plis pase 620 milyon goud pou pwoteje on seri vil kont inondasyon

Pòtoprens, 4 mas 09 [AlterPresse] --- Gwo lapli k ap tonbe toupatou, nan jou sa yo, nan peyi d Ayiti, lage popilasyon an nan tèt chaje.

Plis pase yon milye moun deja sinistre, dapre enfòmasyon ki vin jwenn ajans sou entènèt AlterPresse.

Gwo ma labou ak pil fatra fè mikalaw divès kote nan lari Pòtoprens. Popilasyon an gen anpil difikilte pou sikile kòmsadwa nan kèk zòn, akoz labou ak ma dlo sal.

Nan yon seri rakwen nan Pòtoprens, tankou Matisan, nan sid kapital la Pòtoprens, se sou bourèt moun ap travèse ma labou. Gen kèk kote, menm machin pa ka sikile, jan sa ta dwe ye.

Se menm penpenp lan nan vil Gonayiv pou koumansman mwa mas 2009 la. Vil depatman latibonit sa a te deja anba dlo nan mwa septanm 2008, lè plizyè santèn kretyen vivan te fè vwèl pou peyi san chapo. Jounen madi 3 mas 2009 la, menm lekòl pa t ka travay nan Gonayiv akoz sitiyasyon sa a.

Nan komin Site Solèy, yon latriye kay gen tan benyen ak dlo akòz pwoblèm kannal ki pa genyen pou dlo lapli a kouri.

Sitiyasyon sa a se rezilta gwo lapli k ap tonbe sou tout peyi a depi yon semenn konsa.

Nan Kabarè, sou yon distan apeprè 30 kilomèt nan nò Pòtoprens, plim gen tan leve sou do popilasyon an. Moun Kabarè yo pran lari, jounen mèkredi 4 mas 2009 la, pou mande gouvènman, Michèle Duvivier Pierre-Louis ap dirije a, pran bon jan dispozisyon pou konstwi pon sou larivyè ki travèse vil la.

Nan dènye ane sa yo, Kabarè se youn nan komin ki toujou viktim chak ane anba inondasyon apre lapli fin tonbe.

Gouvènman an fenk lanse yon pwogram kote li anonse yon bourad lajan, ki depase 620 milyon goud, pou pwoteje yon latriye vil kont inondasyon. Vil sa yo, se : Jakmèl, Leyogàn, Kabarè, Gonayiv ak Pòtoprens.

Se ministè travo piblik, transpò ak kominikasyon ki anchaje kondui pwogram sa a.

Lajan sa a, kise 623 milyon 244 mil goud, pral sèvi pou netwaye kannal, wout, mete gabyon nan kèk wout, repare kèk pon ki pa fin kòdyòm yo, ak pwoteje basen vèsan yo.

Se biwo kominikasyon biwo premye minis la ki bay enfòmasyon sa a madi 3 mas 2009 la. Gouvènman an prevwa bay anpil moun travay nan kad pwogram sa a.

Gen 315 milyon goud ki pral jwenn vil Gonayiv pou prepare sezon siklòn 2009 la. Travay ki pral fèt Gonayiv yo ta dwe dire 6 mwa, daprè sa zotobre nan gouvènman an fè konnen.

Nan Kabarè, biwo premye minis lan anonse yo pral travay nan larivyè Bretèl ak Tòsèl. Yo prevwa tou fè reparasyon nan pon k ap dodomeya sou wout nasyonal nimewo 1 yo tou. Travay sa yo ap koute 137 milyon goud. [do rc apr 04/03/2009 15:00]