Haiti

Nasyonzini / Ayiti: Yon selebrasyon anba tansyon


lendi 30 oktòb 2006

[28/10/06] Misyon Nasyonzini pou estabilize Ayiti (MINISTA) fete madi 24 oktòb nan Pòtoprens, nan tèt kole ak gouvènman ayisyen an, 61 lane depi LONI te kreye.

Selebrasyon sa a te fèt nan yon sitiyasyon tansyon. Plizyè gwoup manifestan ankòlè, ladan yo divès etidyan Inivèsite Leta Dayiti, te voye anpil pawòl piman bouk kont MINISTA yo tap mande kite peyi Dayiti. La polis te arete plizyè nan manifestan yo.

Lari bloke ak vye kawotchou kap boule, voye wòch pasi pala, pawòl pike kont MINISTA. Se sitiyasyon sa a ki te genyen sou channmas apre seremoni selebrasyon yo nan Mize Panteyon Nasyonal (MIPANA). Lapolis te arete pliszyè nan etidyan ki tap manifeste yo poutèt yo ta kalonnen polisye yo ak wòch.

“Nan moman Ayiti ap selebre papa endepandans li Jean Jacques Dessalines, fòs sekirite etranje pa gen plas li nan peyi a”, dapre manifestan yo. Kèk nan etidyan yo kontinye pou yo di “alòske polisye ayisyen yo ap touche yon ti kraze monnen, sòlda Nasyonzini yo ap byen mennen san yo pap regle anyen serye nan peyi a”, dapre yo.

Nan seremoni ki te fèt anvan leve kanpe sa a nan MIPANA douvan manm gouvènman an ak yon latriye diplomat etranje, Premye minis Jacques Edouard Alexis te remèsye MINISTA ak tout ajans Nasyonzini yo pou travay yo an Ayiti epi wete chapo douvan sòlda Nasyonzini ki pèdi lavi yo pandan travay yo an Ayiti.

Sou bò pal, alatèt MINISTA an Ayiti, Edmond Mulet, te fè sonje jefò Òganizasyon Nasyonzini deja fè e ap kontinye fè pou kore gouvènman ayisyen nan tabli lapè, demokrasi ak devlopman an Ayiti. [28/10/06]