Haiti

Yon plan pou fè lapolis vin pi "pwofesyonèl"


sanmdi 12 out 2006

[12/08/06] Gouvènman ayisyen ak Misyon Nasyonzini pou estabilize Ayiti (MINISTA) mete kanpe yon plan pou fè divès refòm nan Lapolis peyi Dayiti, yon fason pou enstitisyon sa a fè travay li pi byen ki se mete lòd epi pwoteje moun ak byen yo, kidonk bagay ki rele yo chèmèt chèmètrès.

Dapre responsab enfòmasyon nan MINUSTA ki bay nouvèl la pandan yon chita pale ak laprès jedi 10 out, plan sila prevwa pou Misyon Nasyonzini an Ayiti kontwole fason yap angaje nouvo ofisye nan Lapolis la.

David Wimhurst fè konnen plan sa a fè pati yon latriye dispozisyon pou fè polis nasyonal Ayiti a vin pi pwofesyonèl.

Pandan yon vizit nan Pòtoprens nan koumansman mwa out la, sekretè jeneral Nasyonzini an te mande pou gen yon bon jan refòm ki fèt andedan lapolis la, yon fason pou pèmèt enstitisyon sila fè fas kare pi byen ak klima vyolans ki blayi sou peyi a.

Dapre Kofi Annan, li enpòtan pou Ayiti gen yon fòs sekirite ki ka garanti sekirite tout moun. Li pa nòmal pou yon ti ponyen polisye kòwonpi oubyen ki tranpe nan zak vyolasyon dwamoun ap sal figi tout enstitisyon an, dapre alatèt Nasyonzini an.

Sou bò pal, prezidan René Préval, nan konferans pou laprès tèt ansanm li te bay ak Kofi Annan, te mande Nayonzini voye an Ayiti kèk twoup espesyal ak polisye pou kapab vin kore batay lapolis Ayiti ap mennen kont gwoup ak zam yo ak pwoblèm kidnapping lan. [12/08/06]