Haiti

Monseyè Desmond Tutu ap vizite Ayiti


sanmdi 4 fevriye 2006

[04/02/06] Pri nobèl lapè Afrik Disid, Monseyè Desmond Tutu, ap fè yon virewon an Ayiti, sòti 11 pou rive 14 fevriye.

Se evèk Legliz episkopal Ayiti Monseyè Jean Zaché Duracin ak Misyon espesyal Ã’ganizasyon Leta meriken (OEA) pou bay demokrasi jarèt an Ayiti ki envite pri nobèl la fè vizit sila. Pandan virewon li an Ayiti, Monseyè Desmond Tutu ap fè chita pale ak manm gouvènman pwovizwa ayisyen an, manm sosyete sivil la, alatèt pati politik yo, reprezantan OEA ak divès responsab nan legliz.

Dimanch 12 fevriye, achevèk legliz anglikan Afrik Disid la ap selebre yon gwo mès nan katedral Sent Trinite nan Pòtoprens douvan otorite nou sòt site la yo.

Lendi 13 fevriye, Monseyè Tutu ap fè yon kout pye nan Okap Ayisyen, dezyèm vil peyi Dayiti. Apre sa, Li prale nan peyi Brezil poul al patisipe nan Asanble jeneral Konsèy ekimenik Legliz yo.

Pri nobèl lapè Afrik Disid la ap pwofite pasay li an Ayiti poul louvri « Sant Desmond Tutu pou rekonsilyasyon ak lapè » kap chita nan Katedral Sent Trinite nan Pòtoprens e ki pral travay sou sipèvizyon Biwo anglikan edikasyon an Ayiti (BAEH). Misyon sa a ap genyen poul remanbre travay Legliz episkopal ak fè nan domèn edikasyon.

Fòn fè sonje, Ã’ganizasyon leta meriken te tanmen pa gen lontan sa an Ayiti yon pwogram pou envite kretyen yo priye pou lapè ak rekonsilyasyon. Yon premye mès nan sans sa a te fèt nan katedral Legliz katolik womèn 15 fevriye pase. [04/02/06]