Haiti

Ankèt sou sikonstans lanmò Kòmandan MINISTA


sanmdi 7 janvye 2006

[07/01/06] Yon jeneral brezilyen mouri an Ayiti. Yo dekouvri kadav Bacellar Urano Texeira Da Matta benyen ak san 7 janvye, nan maten, douvan chanm li nan yon gwo otèl nan lès Pòtoprens.

Dapre premye enfòmasyon yo, Bacellar Urano Texeira Da Matta, ta touye tèt li nan lannwit 6 janvye apre yon bouch louvri li te genyen ak reprezantan espesyal sekretè jeneral Nasyonzini an an Ayiti, diplomat chilyen Juan Gabriel Valdès.

Anbasadè Brezil la an Ayiti, Paolo Cordeiro de Andrade Pinto, derefize pale sou sikonstans lanmò a. Li senpman wete chapo douvan memwa Da Matta ki, dapre li, se te yon kòmandan vanyan.

Nan yon kominike li mete deyò, Nasyonzini fè konnen gen yon ankèt kap mennen sou sikonstans lanmò trajik sa a.

Bacellar Urano Texara Da Matta te ranplase konpatriyòt li Augusto Heleno Ribeiro nan tèt konpozan militè MINISTA 31 out 2005.

Evenman sa a rive nan yon moman anpil sektè ap kritike travay Fòs Nasyonzini an (MINISTA) ak travay chèf misyon sa a, Juan Gabriel Valdès.

Sektè biznis la mande popilasyon an obsève yon jounen grèv jeneral ak pwotestasyon lendi 9 janvye, yon fason pou fòse MINISTA pran bon jan dispozisyon pou garanti sekirite nan peyi a.

3 dènye semenn sa yo, bandi ak zam touye plis pase yon trantèn moun nan Pòtoprens alòke yo kidnape plis pase yon karantèn lòt, dapre Lapolis. [07/01/06]