Haiti

Plent kont ansyen prezidan Aristide


lendi 7 novanm 2005

[05/11/05] Gouvènman ayisyen an depoze yon plent douvan tribinal federal Miami (Etazini) kont ansyen prezidan Jean Bertrand Aristide ak plizyè ansyen gwo chabrak rejim lavalas la.

Dapre sa ki di nan dosye plent sa a, sòti peryòd 2001 pou rive 2004, Aristide ak konplis li yo fè chimen krochi ak plizyè dizèn milyon dola ki te nan kès Leta ayisyen.

Dapre dokiman an, ansyen prezidan an ak divès fonksyonè rejim lavalas la ta transfere Ozetazini yon pati nan lajan yo vòlè nan kès peyi Dayiti. Pami antrepriz Leta rejim la dechèpiye, dosye plent la site konpayi nasyonal telefòn Teleko.

Pou te kapab rive kraze kès antrepriz sa a, Jean Bertrand Aristide ak konplis li yo te foure anndan Teleko yon latriye patizan l. Pami gwo chabrak lavalas plent la lonje dwèt sou li, ou jwenn ansyen minis Faubert Gustave, ansyen reponsab Bank popilè ayisyen (BPH) ak Lesly Lavelanet, yon bòfrè Mildred Trouillot, madan Jean Bertrand Aristide.

Anplis piye kès Leta, dokiman an akize ansyen prezidan an tou kòm moun ki te ankouraje komès dwòg an Ayiti pandan dezyèm manda l la.

Dapre chif otorite meriken yo mete deyò, apeprè yon senkyèm nan kantite dwòg ki antre Ozetazini, apre yo fin sòt Kolonbi, pase an Ayiti.

Gen plizyè ansyen gwo fonksyonè rejim lavalas ak ansyen gwo otorite nan Lapolis nasyonal Ayiti ki nan prizon nan peyi meriken poutèt yo tranpe nan komès poud. [05/11/05]