Haiti

Gouvènman dominiken lage koukouwouj dèyè Ayisyen


jedi 18 out 2005

18/08/05 --- Gouvènman Dominiken pa deside kampe sou mouvman pimpe moun an Ayiti pa bann ak pa pakèt. Enfòmasyon ki sòti nan zòn fwontyè Wanament (nòdès) fè konnen, nan dat 17 dawout 2005 la, otorite yo nan Sen Domeng arete epi voye an Ayiti 200 ayisyen yo di ki san papye.

Otorite lokal nan nò Repiblik Dominikèn fè konnen depòtasyon yo pral kontinye. Pi gwo objektif yo, dapre sa yo di, se fini ak zafè mandyan ayisyen nan lari vil ki nan nò peyi a.

Sòti 25 jiyè pou rive 17 dawout 2005 la, otorite dominiken yo pouse do plis pase 1425 sitwayen ayisyen mele ak dominiken paske yo gen koulè nwa.

Yo te deja voye tounen an Ayiti 1125 sitwayen ayisyen mele ak dominiken nan zòn Beladè (zòn lès Ayiti) nan peryòd 25 jiyè al 16 dawout 2005, dapre enfòmasyon Gwoup k ap Apiye Rapatriye ak Refigye yo (GARR) rapòte.

Chif 1225 moun Dominiken voye tounen nan Beladè soti 25 pou rive 16 dawout 2005 la, pi piti pase kantite sitwayen ki ta ateri reyèlman nan zòn nan, paske « gen nan yo k pa pase wè komite dwa moun nan Beladè ».

GARR denonse depòtasyon yo ki pa respekte pwotocol akò 2 peyi yo te siyen epi ki fikse lè pou depòtasyon kab fèt. Nan dat 13 dawout 2005, yo depòte 146 moun, pami yo yon ti bebe 3 mwa, a 10 zè nan aswè. (18/08/05)