Haiti

Egzamen bakaloreya ap dewoule anba gwo kout zam


madi 21 jen 2005

21/06/05 --- Egzamen bakaloreya premye pati yo demare jounen lendi 20 jen an nan peyi Dayiti. Pou pi piti, gen 126 mil kandida kap patisipe nan egzamen sa yo kap dire twa jou. Nan Pòtoprens, se anba gwo kout zam bandi, elèv yo pran lari pou al pase egzamen sila yo.

Bò kote responsab yo, gen dispozisyon ki pran pou evite kandida yo viktim anba men atoufè. Kèk lekòl tankou Lise Petyon, Ti Seminè Kolèj Sen Masyal ak lekòl ki chita kò yo nan katye bandi yo okipe pa sèvi pou syèj egzamen. Zotobre nan edikasyon nasyonal te pito chwazi Fakilte ki nan Inivèsite leta a yo, tankou Syans Zimèn, Dwa, Syans, elatriye pou fè sant egzamen.

Kèk kandida ki te pale ak AlterPresse fè konnen zak vyolans yo konsène yo anpil. Sependan, elèv sa yo di yo prè pou pase tèks egzamen yo ba yo a.

Granm maten nan lendi, nèg zam te gentan kreye panik nan zòn Avni Poupla. Yo tap tire tribò e babò, fè tout moun kouri, menm machann ki te gentan mete komès yo deyò. Chofè kap fè Nazon Pòs Machan te blije kase tèt tounen pou pat viktim anba men atoufè.

Egzamen pou klas reto yo, se twazyèm seri egzamen kap fèt pou ane lekòl 2004 ak 2005 lan. Semèn ki sot pase yo se te tou pa elèv sizyèm ak nevyèm ane fondamantal. Egzamen sa yo te fèt san vyolans. Sependan, atoufè yo te pwomèt yap okipe beton an pou egzamen reto ak filo. (21/06/05)