Haiti

Gérard Latortue : " se yon gwo kou Etazini bay Ayiti "


lendi 30 me 2005

[28/05/05] Premye minis ayisyen an Gérard Latortue kondane 27 me desizyon Depatman deta meriken pran pou mande sitwayen meriken ak fanmi yo ki an Ayiti pou yo kite peyi a lakòz vyolans ak ensekirite.

« Se yon desizyon ki pa kòrèk. Se yon gwo kou Etazini ban nou”. Se konsa chèf gouvènman ayisyen an konsidere desizyon Depatman deta a.

Premye minis ayisyen kontinye poul di li pa konprann ki jwèt kap jwe la. « Se nan moman Ayiti pi bezwen zanmi li yo, Etazini pote l kou sa a ». Gérard Latortue gen nan tèt li eleksyon pou pòs prezidan, eleksyon lejislatif ak lokal ki dwe fèt nan finisman ane 2005 la.

Anbasad Etazini an Ayiti te fè soti kominike ki mande sitwayen meriken yo kite Ayiti a 26 me, kidonk yon jou apre bandi ak zam te tire sou yon machin Anbasad meriken nan nò Pòtoprens. Machin sila kite blende te gen ladanl 3 diplomat.

Premye Gérard Latortue fè konnen li pa konprann desizyon Etazini a paske se pou premye fwa yon machin meriken sibi atak an Ayiti. Alòske, gen lòt kote, dapre chèf gouvènman ayisyen an, sitwayen meriken ap mouri anba bal pa dizèn e menm pa santèn toulèjou e yo fè konnen demokrasi ap vanse kote sa yo.

Dapre kominike anbasad meriken, dispozisyon depatman deta a pa vle di Etazini ap fèmen anbasad li an Ayiti ni lap sispann pwogram koperasyon l ak Ayiti. [27/05/05]